مچکدگانی دوار ءِ نِندوکیں مرد ڈاکٹرے اَت کہ آئی ءَ وتی وانگ گوں دمگی سنگتاں شال ءَ (بی ایم سی) ءَ سرجم کتگ اَت ءُ آیاں ڈاکٹری ءَ ھوار سیاست ءِ بابت ءَ ھم ونتگ اَت۔ آئی ءِ دو جِنکّیں چُکّ ات اَنت ءُ آ دوئیں جِنکّاں چِہ کستریں چُکّ بچکے اَت۔ چہ نواب اکبر بُگٹی ءِ کُشگ ءَ پد گُڑا بلوچستان ءِ جاور روچ پہ روچ نگیگ بُوھان اَت اَنت ءُ بلوچستان ءِ زانتکار ءُ کواساں سیاسی جُھد بِندات کُت، چوش کہ مچکدگانی دوار ءِ مرد ءَ ھند ءَ سیاسی جُھد ءِ یک لڑے چو آپ ءِ داب ءَ چِست اَت۔ مچکدگانی دوار ءِ نِندوکیں مرد ءَ ءُ آئی ءِ دمگی زانتکاراں زانت کہ نوں مرد سک زھر گِپتگ ءُ بلوچ ءِ شناس ءِ گار کنگ ءَ دُمب ءَ اِنت، گُڑا آئی ءَ گوں وتی ھند ءِ زانتکاراں یک دیوانے برجم داشت ءُ یک اِدارھے اڈّ دیگ ءِ جار جَت کہ آئی ءِ نام (بی این ایم) گچین کنگ بُوتگ اَت۔ اے اِدارہ ءِ جُوڑ کنگ ءِ مکسد بلوچ راج ءِ سر ءَ بوتگیں زُوراکیانی ھِلاپ ءَ آواز چست کنگ اَت ءُ بلوچ راج ءِ وتواجھی ءِ مُوکگ اَت۔
چہ دیوان ءِ اڈّ دَیگ ءَ پد روچ پہ روچ سیاسی جُھد ودّان بُوھان بوت ءُ جُھد ءِ پِڑ ءَ بازیں بلوچ جُھدکاراں بھر زُرت ءُ اے جُھد بلوچستان ءِ ھر دمگ ءَ تالان بُوھان بوت ءُ بلوچستان ءِ ھر شھر ءُ میتگ ءَ بلوچ راجی جُھدکار گِندگ بوت اَنت کہ آیاں وتی ھکّ ءِ لوٹ کُت۔
ھمے داب ءَ وھد پِرگْوزان بوت ءُ بلوچستان ءَ جاور گنتِر بُوھان اَت اَنت ءُ پاکستانی پوج ءَ پوجی آپریشن بِندات کت اَنت ءُ مزنیں کساسی ءَ مردم لٹ ءُ کُٹ کت اَنت۔ بازیں ورناہ، پیر ءُ کماش چست کنگ ءُ زندانی کنگ بوت اَنت، چی ءَ کہ آئی مُول ءُ مُراد بلوچ راجی جُنز ءُ آجوئی ءِ جُھد ءِ ھلاس کنگ اَت، بلے بے سوبی ءِ آماچ بوت۔ پمشکا چست بوتگیں بلوچ پُسّگانی تیر سُپتگیں جون ماں کَور ءُ کیلگاں دست کپت اَنت ءُ بازیں جُھدکارے رستراں گُونییانی تَہ ءَ کُشتگ ءُ دَؤر داتگ اَت۔
ھمے چِست بُوتگیں مردُمانی نْیام ءَ یکّے ڈاکٹر دین جان اَت کہ آ ھُزدار ءِ دمگ اُورناچ ءَ بیست ءُ ھشت جلکان (نجون ) دو ھزار ءُ نُھ ءَ آوار جَنَگ ءُ زندانی کنگ بوت۔
آ وھد ءَ دین جان ءِ جِنکّ سمّی ءُ مھلب ھر دوئیں سک کسان اَت اَنت ءُ آیانی اَبّا آوار جَنَگ بوتگ اَت، گُڑا ھما روچ ءَ چِہ سمّی ءُ مھلب ءَ وتی پِت ءِ آجو کنگ ءِ ھاتِر ءَ جُھد بِندات کُت۔ سمّی ءُ مھلب ءَ وتی کسان اُمری نہ چار اِت، بلکیں روچے ماں شال ءَ ءُ روچے ماں کراچی پریس کلب ءِ دیم ءَ زھرشانی کُت کہ مئے سرجمیں گِس ءِ اُمیت، ھست ءُ نیست مئے اَبّا بُوتگ کہ ما آئی ءِ دستانی چیر ءَ رُستگ ءُ مزن بُوتگ اِیں، بلے بلوچ ءِ دُژمِنان اے کسانیں جِنکّوانی سر ءَ تُشے ھم بزّگ نہ بوت۔
سمّی ءُ مھلب ءِ توار کَس ءَ گُوش نہ داشت، گُڑا دو ھزار ءُ سیزدہ ءَ گار ءُ بیگوائیں مردُمانی یل کنگ ءِ درگت ءَ بلوچ گار ءُ بیگواھیں مردمانی گل ءِ وائس چیئرمین ماما کدیر ءَ پادان ءَ یک سپرے ءِ بِندات کنگ ءِ جار جَت کہ آ سپر چہ شال ءَ بِندات بوت دانکہ اسلام آباد ءَ، گُڑا ھمے پادانیں سپر ءِ توک ءَ ڈاکٹر دین مھمد ءِ مستریں جنک سمّی بلوچ ءَ ھم بَھر زُرت ءُ سئے ھزار کلو میٹر ءَ پادان ءَ سپر آسر کُت، بلے بدبھتی اِش اَت کہ اسلام آباد واکداراں ھم سمّی بلوچ ءُ اے دِگرانی اَرز ءُ پِریات گُوش نہ داشت اَنت۔
بلے نوں چاردہ سال سرجم اِنت کہ سمّی ءُ مھلب بلوچ اَنگت پہ وتی اَبّا ءِ ودار ءَ نِشتگ اَنت، برے گوں یکّے ءَ پِریات کن اَنت بلے بزّگیں بلوچ ءِ دردوار کَس نہ اِنت۔
منی دُوا اِنت گوں ھُداوند ءَ کہ سمّی ءُ مھلب ءِ اَبّا ءَ ھوار سرجمیں بندیگیں بلوچ آجو بات اَنت، شالا انچوش بات۔۔۔۔۔۔۔۔
***
