اے وتن! ما ھمود ءَ اِت اِیں کہ جنگ بِنا بوت، ما ھمود ءَ اِت اِیں کہ ھر گِس ءَ آس کپت، ما ھمود ءَ اِت اِیں کہ ھون رِتک اَنت ءُ لاش کپت اَنت، تئی زیبائی ءَ چو مُرگ ءَ بال کُت۔ بلے منی چمُاں تو انگت زیبا ئے، تئی زیبائی مرچی ھم منی چمّانی اندر ءَ ھما وڑ ءَ سھرا اِنت۔ رولہ، دِیگر، اِستال جڑکوکیں آزمان، چاردہ ءِ ماھِکان، بامسار، چِست بیتگیں روچ ءِ بْرانز، سْرپتگیں پُلّانی وشبو، کوھانی بُرزی، شیپ ءِ سِکانی تتکگیں آپ، تیاب ءِ چَول، سانوڑی نودانی شنز ءُ اَبرم ءِ دُرستیں رنگ ترا زیبا کن اَنت۔
منی دل ءِ دِریکگ، چمُانی رُژنائی، رگانی تتکگیں ھُون، آگھیں چمّانی دیستگیں واب لوٹ ءُ واھِشتاں چہ سمبھینتگیں دُنیا ءُ منی زندگی دُرست ھمے گواھی ءَ دینت کہ تو زیبا ئے۔ شپچراگ گْوش اَنت تو رُژنائیانی سرزمین ئے، پاتو گْوش اَنت تو رنگاں چہ رَتکگیں سنجے ئے، پُل گْوش اَنت تو وشبوھاں مینتگیں دیارے ئے، کوہ گْوش اَنت تو تلارے ئے ءُ ریگزار گْوش اَنت تو بے مٹّ، بے درور ءُ بے کِساس ئے۔ دُرست تئی مزنی ءِ گواھی ءَ دینت۔
منی وتن! تو چِست بیتگیں روچ ءِ ھما برانزے کہ منی دل ءِ سیاہ ءُ تھاریں دمکاں وتی رُژن ءَ تالان کن ئے۔ تو سْرپتگیں پُلّانی ھما وشبو ئے، ھردیں تالان بہ ئے گُڑا منی ارواہ تاھیر ءُ کرار گیپت۔ تو منی چمُانی ھما شیرکنیں واب ءِ کہ تئی گَندگ ءَ شپ پہ آگھی گْوازینتگ۔
منی وتن! منی ءُ تئی مھر ءِ سْیادی ھما روچ ءَ چہ بِندات بوت کہ منی اولی پاد ءُ کدم تئی دِلبند ءِ سر ءَ کپت اَنت۔ گوں ھیرانی ءَ تئی زِر ءِ چَول چار اِت اَنت۔ ریک ءِ ماڑی جوڑ کُت اَنت، کُچک ءُ کرکینکانی چِنّگ ءَ اُمرے گْوازینت۔ کوہ ءُ کوچگ سیل کُت اَنت، مُرگانی کوکوئیں بْرمش ءُ ھَورانی توار اِش کُت اَنت۔ آ چونیں وشّیانی روچ اِت اَنت گِندئے۔۔۔۔۔۔۔؟ نوں تو ھینچو بہ گْوش کہ آ پاتو، شپچراگ، مُرگ، کُچک ءُ کرکینک کُجا شُت اَنت۔؟ ھما کِشک ءُ دگ، ھما دمک ءُ در، ھما بان ءُ ماڑی، ھما بام ءُ سُھب، ھما بیگاہ ءُ رولہ گوں دِیگر ءَ کُجا شُت اَنت۔؟ بلے منی وتن! ما بہ لوٹ اِیں پہ ترا چے کُت نہ کن اِیں۔۔۔۔۔مئے مھر ترا پد ءَ سمبھین اَنت ءُ نوکیں زندگی یے بکشاینت۔
منی وتن! منی وس ءَ بہ بیت، گُڑا تئی مِسکیں ھاکاں چُکان ءُ وتی چمّاں داراں۔ تئی ھاک منی چمّانی سُرمگ اَنت۔ تئی ھاک ءِ دُن آتاریں وشبو منی ارواہ ءِ تاھیر اَنت ءُ زرد ءِ کرار۔ اگاں منی وس ءَ بیت اِیں، گُڑا تئی باگ ءِ ھمک پُل من بوسہ دات اَنت، تئی ماہ ءِ ماھِکان وتی دل ءَ داشت، تئی کوھانی بُرزی من سلام کُت اَنت، تئی نیلیں زِر ءَ من مھر ءِ بوجیگ چَولانی میار کُت اَنت۔ تئی کَور ءُ شیپانی تتکگیں آپ وتی جان ءِ رگانی ھون کُت اَنت۔ تئی ریگزار من وتی واھِشت ءُ ارمانانی بُنجل کُت اَنت۔ تئی دمک ءُ در من وتی وابانی بُنجاہ کُت اَنت۔
منی وتن! منی یاتانی تہ ءَ، منی بچکندگ ءُ ٹھکانی تہ ءَ، گپ ءُ الوتانی تہ ءَ، منی شوھاز ءِ تہ ءَ، ءُ جیڑگ ءُ ھیالانی تہ ءَ بس توئے۔۔۔۔۔۔۔تئی مھلبیں ھاکانی سر ءَ وھدے وتی سر ءَ اِیر کناں من ءَ کرار رس اِیت، پمشکا من بوپ ءُ بالِشتانی سر ءَ نہ وپس آں۔۔۔۔۔بلکیں تئی کوہ ءُ اگاراں وپس آں۔۔۔۔۔۔
منی وتن! منی زندگی پہ ترا کُربان اِنت۔ منی جان ءِ رگ ءُ بندانی تتکگیں ھونانی ھمُک تْرمپ تئی امانت انت۔ منی پِکر ءُ جیڑگ ھم تئی امانت اَنت۔ تو منی چمّانی رُژنے، من پمشکا ھستاں کہ تو ھست ئے۔ تو منی ھست بُوَگ ءِ گْواہ ئے۔
منی وتن! سُھب ءِ سارتیں سمین تئی دیاراں کشان بِہ بات، ءُ روچ ءِ تپتگیں برانز دگہ نیمگے بات اَنت۔ ساھیل ءُ ساچانیں موسم تئی سر ءَ دائم میلانک بہ بات اَنت۔ منی وتن تئی سر ءَ سْیاہ ءُ تُرسناکیں شپ کدی ھم میاھات، بلکیں ماھِکان ءُ اِستال جلشکیں شپ مُدامی تئی نسیب ءَ بات اَنت۔۔۔۔
***
