مروچی ما چمّاں شانک بِہ دے اِیں ءُ بِچار اِیں گُڑا بلوچ راج ءَ وتی سرڈگار (پجّار) ءِ رکّینگ ءِ ھاتر ءَ وتی نُگرھیں زِند دوست نہ داشتگ ءُ پہ آوُکیں پدریچ ءِ وشھالیں زِند ءِ گْوازینگ ءِ ھاتر ءَ ورنا گوں پَھک دِلی ءَ جُنز ءَ ھوار بوتگ اَنت ءُ دیم پہ مِنزل ءِ نیمگ ءَ رھادگ اَنت۔ چوش کہ بلوچ راج ءِ تمرد ءُ کُنگریں بچّاں اے سما ءُ زانت وتی اندر ءَ ودی کُتگ کہ آجوئی بید ء کُربانی ءَ نہ رس اِیت۔ وھدے کہ ما گُلزمین ءِ مِھر ءَ سرپد بِہ بَہ اِیں، گُڑا من پہ جزم گْوش آں کہ بلوچ راج ءِ ھر زھگ پہ دُژمن ءِ بے سوب کنگ ءِ ھاتر ءَ چو تمردیں بچّانی رنگ ءَ دلبند ءَ شُورواں بند اِیت ءُ کارگاہ ء ھیات ءِ میدان ءَ پہ وتی دائِمی ئیں ابدمانی ءَ اِیر کپ اِیت۔
مروچی بلوچ راج ءِ نتُرس ءُ سوھوئیں سر سرپد بوتگ اَنت کہ ما اگاں مَرگ ءِ تُرس ءَ وت ءَ ھاموش بِہ کن اِیں ءُ سر ءَ جَھل، گُڑا ھر آؤکیں پدریچ مارا ھِچ رنگ ءَ نہ بکش اِیت، چی ءَ کہ آ اے ھبر ءَ الم مار اَنت کہ مئے پِت ءُ پیرُکاں اگاں زِند زوالیں گُلامی ءِ ھِلاپ ءَ دیمونی بِہ داتیں ءُ جُھد بِہ کُتیں، ما مروچی دری راجانی زُلم ءُ زورانی دِیمپان نہ بوتگ ات اِت اِیں۔
اَنچوش کہ ما وتی گْوست ءَ چار اِیں، گُڑا مئے دیم ءَ ھزاراں جُست سھرا بیت ءُ وتی پسّوھانی اُمیت ءَ رھچار۔ جُست ءِ پسّو پرے ھاتِر ءَ کہ مئے راجی رھشوناں اگاں جُوانیں ءُ گِھتریں جُھدے بِہ کُرتیں، راجی زرمبشت ءِ بارو ءَ سرپدی لس بلوچ ءَ را بِہ داتیں ءُ پہ ھر وڑیں دِیمونی ءِ دَیَگ ءَ ساجو بِہ کُرتیناں، ما مروچی الم چو بنگالیانی پیم ءَ یک آجوئیں زِندے ءِ واھُند ءُ واجہ اِت اِیں۔
چی ءَ کہ بنگالیاں جُھد کُتگ ءُ آزاتی ءِ گْراں بهائیں سوگات ڈِیھے ءِ دْروشم ءَ دست گِپتگ ءُ سوبین بوتگ اَنت۔ مروچی بنگلا دِیش ءِ راج وتی زِند ءَ آزاتیں راجانی وڑ ءَ گْوازینگ ءَ اَنت۔ بلوچ راج ءُ بَنگالی راج ءِ دُژمن یکّین پاکستان اِنت، ھر دوئیں راجاں گُلامی مار اِتگ ءُ جُھد کنگ ءَ ساڑی بوتگ اَنت، بلے بلوچ راج اَنگت وتی گُلامی ءِ سانکلانی پُروش دَیگ ءَ گوں گُلائیش اِنت پَرچا۔۔۔۔۔۔۔۔؟
پرچا کہ بلوچ راجی آجوئی ءِ گَل اَنگت پہ تِپاکی ءِ ھاتر ءَ سُوبین نہ بوتگ اَنت، اَگاں ما مروچی بلوچ راجی آجوئی ءِ سنگر ( براس ) ءَ گِند اِیں، گُڑا مارا وژدلیں کلوھے اَلم رس اِیت ءُ مجید برگیڈ ءِ کامیاتیں اُرش ھم ھمے سِنچ ءُ سما ءَ دنت کہ اِے تِپاک ءُ یکمُشتی ءِ برورد اِنت، بَلے راجکاری ءِ پِڑ ءَ بلوچ گَلانی سوبین بُوَگ ءِ دِلجمیں کلوہ سر نہ بیتگ۔ دَرور ھستیں وھد ءَ ما بِچار اِیں اَنگت بَھر ءُ بانگی ءِ آماچ اَنت۔
بلوچ راجی آجوئی ءِ لوٹ ھمیش اَنت کہ ما راجکاری ءِ پِڑ ءَ تِپاک ءُ یکجاہ بِہ بَہ اِیں دانکہ جَھان ءَ را جْوانیں کلوھے یے دَیگ ءَ سوبمند بِہ بَہ اِیں، ءُ اے راستی یے کہ ھر گَل وتی جِتائیں ارزِشت ءُ پجّارے دار اِیت ءُ آھانی رھشون، بلے راجی سیت ءُ نپّانی باپُشت ءَ من ھمے سرپد بَہ آں کہ کُل بے مانا اَنت۔ اَگاں تئی جتا جِتائیں بچّار تئی تاگت ءَ بَھر ءُ بانگ بِہ کنت ءُ ترا وھدے جُھد ءِ میدان ءَ سوبمند بُوَگ ءَ مَیل اِیت، گُڑا ما بِہ زان اِیں کہ کُلیں چیزانی پُشدر ( پُژدر ) ءَ یک کَست ءُ کِینگے ءَ وتی سر چِست کُتگ ءُ مئے بے سمائی ءَ آپ وران ءُ وتی آگنڈاں مُھکم کنگ ءَ اِنت۔
اَگاں ما مروچی وتی تاگت یک نہ کُت ءُ راجی سیتاناں لَگتمال کُت، گُڑا اے ھبر راستی ءِ دَرور بیت کہ وھد ءِ ھمراھی ءَ راجی مزن نامیں رھشُون جُستانی دِیمپان بَہ اَنت کہ مئے ءُ شُمئے کُجام نزوری ءُ لاچاری بوتگ اَنت کہ ما شُما جُھد ءِ لوٹانی پیلو کنگ ءَ باجبَر نہ بوتگ اِیں۔۔۔۔۔۔۔؟ شُمئے گْوانک ءِ پَد ءَ جنگولیں سراں وتی ھر وڑیں واھگ ءُ واھشت بَبا داتگ اَنت ءُ راجی جُھد ءِ رندگیری کُتگ ءُ شُما رھشُونی، بلے جُست مرچی پرچا ودی بوتگ اَنت۔۔۔۔۔۔۔؟
مرچی ھمے کارگاہ ء ھیات ءِ ( زِندمان ءِ جنگجاہ ) میدان ءَ مزنیں سرے نمیران بوتگ ءُ بازینے گوں دُژمن ءَ دیم پہ دیم ءُ آئرا بے آرام کُتگ۔ پہ وتی ماتیں سرڈگار ءِ پَھریزگ ءَ چو تلاریں کوہ ءَ مِک اَنت ءُ بازینے درانڈیھی ءِ نہ وشیں روچاں تیلانک دَیگ ءَ اَنت، بلے راجی جُنز ءَ گوں ھمگْرنچ ءُ ھر یکّے وتی کچ ءُ کیل ءِ کِساس ءَ پہ تھمبل ءِ مُھکمیں توکلے کُوپگاں زُرتگیں بار ءُ پَرز ءَ گام گام ءَ پیلو کنان اَنت۔
پمشکا مرچی مارا شرّی ءَ زانگی اِنت کہ بلوچ راجی جُنز ءِ دیمروئی ءِ ھاتر ءَ، ءُ مِھلبیں ھاک ءُ ھانُلیں سرڈگار ءَ پہ ندْر بوتگیں شھیدانی اَرواہ ءِ لوٹ ھمیش اَنت کہ تِپاکی مارا رُوژنائیں مِنزلے دنت ءُ کُلیں واھگ سرجم بَہ اَنت، گُڑا بیا اِت مرچی اھد کن اِیں کہ ما راجی نپّ ءُ سیتاں سر گوز نہ کن اِیں ءُ وتی کَست ءُ کینگ ءَ آس دے اِیں ءُ ھوری ءَ جُنز اِیں، چی ءَ کہ ھمے جُنزگ مئے مِنزل ءَ آپسرے ءَ سر کنت، اگاں نا ودگ ودگی ءَ ما وتی مُرادانی گْراں بھائیں مِنزل ءَ ھِچّ رنگ ءَ دست نہ گِر اِیں، گُڑا۔۔۔۔۔۔۔۔۔۔۔۔۔۔۔
***
