اے ھونوار ءُ تاکریچیں موسم ءِ گِلگ گوں چندیں دانکاں نبیسّگ ءُ درشان کنگ نہ بَہ اَنت، چی ءَ بلوچ راج ءَ اے راہ پہ وتی آجوئی ءَ گچین کُتگ ءُ رھادگ اِنت۔۔۔۔۔۔۔گُڑا پہ جزم بِہ زان آں کہ اے تاکریچ ءِ موسم گْوازینگی ءُ ھون ءِ شھجو ماندیگی ءُ آدست بُوَگی اِنت، چی ءَ کہ اے تاکریچ ءُ ھون ءِ شھجو ءَ آدست ابدمانیں بھارمیچ ءُ شادمانیانی بُندر اِنت۔۔۔۔۔۔۔۔۔
بلے! پلستینی شائِر ءُ نبشتہ کار مھمود درویش (محمود درویش) ءِ نبیسّ اِتگیں اے رِد من ءَ گیش وتی نیمگ ءَ کشّ اِیت ءُ ھمے سما ءَ دنت کہ "دریگتیں۔۔۔۔۔۔من سِنگے بوتین آں۔۔۔۔۔! ” ۔
پہ دَروَر مھمود درویش (محمود درویش) ءِ نبیسّ اِتگیں اے رِد ءَ اگاں من سِنگے بوتین آں گُڑا اے درد کدی نہ مار اِتگ اِت اَنت۔۔۔۔۔۔۔۔، ناکہ ھون ءِ وشبو سما کُتگ اَت۔۔۔۔۔۔۔۔۔۔، چی ءَ کہ بے ارواھیں سِنگے چے مار اِیت کہ ھون ءِ وشبو، درد ءُ تورشت، جبین ءِ آسیں پاھار، باتِن ءِ مست ءُ آلاڑیں زِر ءَ چے ھست۔۔۔۔۔۔، بلے بنی آدمانی لد ءَ اے ھبر ءَ بنی آدمے مار اِیت کہ دردانی اے ھون ھوشامیں آتراپ ءَ زیمیں ٹپّانی کُدینگ ءُ درمان کنگ چینچو گْران اِنت، بلے گپّ کہ آجوئی ءِ کَیت گُڑا دُراہ اِیمن ءُ وشّی یے چو سنج ءَ بُج اِیت ءُ اُمیت ءِ تنداں رُوپان کنت۔۔۔۔۔۔۔۔۔
مرچی منی ند کہ شُھدائے شھرک ءِ درگت ءَ نبیسّگ ءَ اِنت، چوناھا ءَ من یھیا پنّام ء سِکے دیستگ اَت، بلے اِنچو ھوار نہ بوتگ آں کہ آئی ءِ زِندمان ءِ بارو ءَ گیش سرپد ءُ لھتیں دانک درشان بِہ کن آں، بلے اے ھبر ءَ پہ پھر گْوش آں کہ یھیا پنّام ء سِکے گوں وتی کُنگُریں بیلی شُئیب پنّام ء ودار ءِ ھمراھی ءَ دیمونی ءِ ھما کارِست پیلو کُت کہ وھد ءِ بے رمیں چَول ءُ گْوستانک ءِ تاک آیاں ھِچّ رمگ ءَ شموشت ءُ بے ھیال کُت نہ کنت، بلکیں آیاں گوں ھما ناماں گیر کار اِیت کہ راج آیانی سر ءَ ناز کنت ءُ وتی بامرد اِش گْوش اِیت۔۔۔۔۔۔۔۔۔۔۔۔۔، پمشکا اے دابیں سر پہ مُجّتی ابدمان بَہ اَنت کہ آ وت ءَ راجی زِندمان ءِ ساٹگ ءَ کولیگ کن اَنت ءُ پہ دمے ارمانی نہ بَہ اَنت ءُ ھمے سر مئے راج ءِ پھر ءُ شان اَنت۔۔۔۔۔۔۔۔۔
ھما کہ دُژمِن ءِ چانٹ ءِ دپ ءَ نِشتگ ءُ پہ زمب ءُ چرپیں دپار دِلمانگ اَنت، آ چرئے ھبر ءَ کدی شمشکار مہ بَہ اَنت کہ ما گوں بدواہ ءِ ھمراھی ءَ وتی برات ءِ کُشگ ءَ لانک بستگ، وتی جِند ءِ ننگ ءِ لپاشگ ءَ سِلاھبند، وتی جِند ءِ گِدان ءِ آس دَیَگ ءَ چاڑکّہ۔۔۔۔۔۔۔۔۔۔۔۔۔
پہ دَروَر اَپریکی گُشتنے کہ آ پہ بدّیں کارپدانی پیلو کنوکاں چوش نوشتہ کنگ بوتگ: دریگتیں! وتی لوگ ءِ سوچوکاں اے گپّ بِہ زانتیں، کہ پُر ءَ ھِچّ مُلّ ( کیمت ) نیست۔۔۔۔۔۔۔۔۔
گُڑا ھما بلوچ کہ بدواہ ءِ ھمراھی ءَ پہ ادارُکی شات ءُ گل اَنت، آ پہ سِتک بِہ زان اَنت کہ وژنامی مارا کدی نسیب نہ بیت، ناکہ گْوستانک مارا گوں مئے بدّیں کارپداں شموش اِیت۔۔۔۔۔۔۔۔۔۔۔، بلکیں گْوستانک دو کارِست ءِ پیلو کنوکیں بالادانی داستان اِنت کہ یکّے ھما کہ جْوانیں کِردے ءِ ھُدابُند ءُ پہ راج ءِ پانپاہی ءَ وت ءَ ببا دنت۔۔۔۔۔۔۔وشبوھیں ھاک ءِ اندر ءَ دوبر دم کشّ اِیت ءُ راج ءِ باتِن ءَ زندگ بیت۔۔۔۔۔۔۔۔، ءُ دومی ھما کہ بدواہ ءِ گوم ءَ دست پہ دست بیت ءُ وتی جِند ءِ ھُنڈالانی بُرّگ ءَ داس ءَ سوھان کنت۔۔۔۔۔۔۔۔۔۔
پمشکا! بلوچ ءِ پُسّگاناں مرچی جیڑگی اِنت کہ آ پہ وت کُجام دگ ءَ گچین ءُ سپر کن اَنت۔۔۔۔۔۔۔۔، چی ءَ کہ اے گچین ھرکسی وتی دست ءِ اِنت، بلے اے ھم اَبرم ءِ راستی یے کہ ھِچّ بنی آدم ءَ پہ وت بدّیں نام دوست نہ بیت۔۔۔۔۔۔۔۔بلکیں آ ھمے لوٹ اِیت کہ من داں زندگ آں پہ شرپ زندگ ءُ مرگ ءَ پد ھم شرپدار بِہ بَہ آں۔۔۔۔۔، گُڑا اے پیسلہ ھر یکّے ءِ وتی دست ءَ اِنت کہ آ کُجام زِند ءُ کُجام مرگ ءَ پہ وت شات کنت۔۔۔۔۔۔۔۔
چو کُنگُریں یھیا ءُ شُئیب، یا ایدگہ بِے مُلّیں سرانی داب ءَ وت ءَ راجدپتر ءِ تاکاں نبیسّگ لوٹ اِیت، یا چو بدواہ ءِ کاسگ چٹّانی وڑ ءَ۔۔۔۔۔۔۔۔۔
گُڈّی ءَ یکرندے پد ءَ گْوش آں کہ پیسلہ ھر یکّے ءِ وتی دست ءَ اِنت، بلے سما مرچی بِہ کن کہ بِہ گِندئے بانداتیگیں روچ تئی مہ بیت۔ پہ دَروَر ما گیر بیار اِیں کہ مارا نمیرانیں ماما انور ءَ چے گْوشتگ ءُ پنت داتگ۔۔۔۔۔۔۔۔۔
بدبھتی ءِ سوگاتاں اِمرُوز ءِ کَوار ءَ کنت
براتے کہ بِہ بیت دُژمِن، سد دُژمِن ءِ کار ءَ کنت
***
