اولی بہر
کریمہ
لمّا جان، اے وہدءَ کہ من گوں تو ہبر کنگءَ آں، من وتارا پہ زور منّارینگءَ آں کہ تو مئے دنیاءَ نہ ئے۔ تئی روگءَ رند من مُردنی شئیرے نویس ات۔ بلئے تو کہ ساجدءِ سرا چیزے نبشتہ کتگ ات، تئی لیکہانی ہشکنگءَ رند من پہ زانت اے شئیر شنگ نہ کت، چیا که من تئی ارواهءَ را تکلیف دئیگ نہ لوٹ اِت۔ اسلءَ منا ہچ مسئلہ نیست ات، بلئے من باز مسئلہءِ سرا گوں تو تپاک کرت ہم نکناں پرچہ کہ بازیں معاملہاں من جتائیں وڑےءَ چاراںءُ تو جتائیں وڑےءَ۔ ہاں تئی اے لیکہاں من رد ہم کرت نکناں۔
من تئی لیکہانی منوکاں بلئے بکش کہ ہمے وڑ کہ تو درانگاز کرت انت، ءُ کنگ لوٹ ات انت، من ستر جیڑ اِت گوں تو تپاک کرت نہ کرت۔
لما! اگاں من رد نہ آں گُڑاں ہبر ایش انت کہ تو بازیں جیڑہانی پشگءِ سبر نکرتءُ وقتءَ پیسر ہبر کنگ لوٹ اِت۔ اے تہر مئے نا پہتہ ئیں سیاسی کلچرءِ اوپارا چہ تیریں (گیشیں) ہبرے ات۔ پرچہ کہ بازیں جیڑہاں کہ تو ہما وڑا چارگ لوٹگءَ ات ئے، آوانی راہءَ آیگءَ وہد در کار اَت۔ تو ندارگانی تہا سکءَ باز و ش رنگی گندگ لوٹگءَ ات ئے۔ بلئے راستی ہمیش ات کہ تئی تبءِ نمہداری ہستیں کارستانی تہا نیست ات۔ تئی چمانی تن ہر وھدا په وش رنگی ئیں نداراہان ات انت۔ منا یاد انت کہ تو ہَیکانءَ اتکگ ات ئے۔ ما درست ندارہان چنچو وش چارگءَ اتیں، بلئے ترا ہچ دوست بوگءَ نہ ات۔ تو ملور ات ئے۔
یک روچے من دیست تو تہنا نشتگ ءُ کسانیں کاہُکےءَ را گوں سکءَ ہُورتی ءَ چار گءَ ات ئے۔ من ترا دسٹرب کنگ نہ لوٹ ات۔ من ہمے مار اِت کہ تو شئیرے جیڈ کا ہے۔ من گڈی روچءَ ترا پرس اِت کہ زی تو گوں کاہُکےءَ اڑتگ ات ئے، باریں کجا سر بوت شمئے گپءُ تران؟ تو کسانیں بچکندے شہارت بس، ہچ نہ گوشت ئے۔ من کہ جاہلی کت تئی پسہ چش ات کہ منیءُ تئی گنوکیءِ پرک ہمیش انت که تو ندارہانی تہا پہ وتا پرشتگیں شئیرے پول ئے، من ندارہانی تہا لیب کنگ لوٹاں۔ تو ندارہاں لُٹّگ لوٹ ئے، من ندارہاں گوں چو سازگرےءِ لنککاں روگ لوٹاں۔ باریں دگہ چے چے نگر ہیں دانک تو شنزگءَ ات ئےءُ من ”حسب عادت“ ترا ہبرءَ نیشت۔ من گوشت تو نوں فلسفہ ”مجاڑ“ زی ئیں شئیراں بگش۔ تو کندگے جت گوشت، بچار ترا منی شئیرءِ گوشدارگءَ چہ گیشتر وتی شئیرے ہتر دئیگی انت۔ اے وہدءَ من ہچ نہ لوٹاں کہ وتی موڑءِ [ماں بہن] بہ کناں۔ منیءُ تئی مشتر که دزگہار کندگءَ لگت ءُ منی ءُ تئی عکسے کش ات ئےِ۔
(روان اِنت)
