جو خاندانی رئیس ہیں وہ مزاج رکھتے ہیں نرم اپنا
تمھارا لہجہ بتا رہا ہے تمھاری دولت نئی نئی ہے
ذرا سا قدرت نے کیا نوازا کہ آ کے بیٹھے ہو پہلی صف میں
ابھی سے اُڑنے لگے ہَوامیں ابھی تو شہرت نئی نئی ہے
مروچی سوشل میڈیا ءَ سک باز دیمروی کُتگ پرچا کہ اے پہ انساناں بلاھیں آسراتی یے۔ مصرؔ ءِ آشوب سوشل میڈیا ءَ منظّم کُت، حُسنی مبارک ءِ دْراج کشّیں زوریں بادشاھی پْروش دات۔ ھمے وڑ ءَ لیبا ءِ کرنل قذّافی ءِ شھنشاھیت ھمے سوشل میڈیا ءِ زور ءُُ تاگتاں ھلاس کُت۔ دانشمندیں راج ، گُلام ءُُ ایر دستیں مھلوک سوشل میڈیا ءَ وتی ھکّ ءَ کارمرز کن اَنت۔ پرچا کہ سرکاری میڈیا وھد ءِ ھاکم ءِ پابند اِنت۔ ھرچے کہ وھد ءِ ھاکم لوٹ اِیت ھما وڑ کنت۔ البتہ یورپ ءُُ ایندگہ دیم ءَ شُتگیں مُلکانی میڈیا چہ سرکاری ھُکماں آجو اَنت، بلے پد منتگین ءُُ اسلامی مُلکاں گیشتر میڈیا وھد ءِ ھاکم ءِ پابند اِنت۔ سرپد ءُُ دانشمندیں راج سوشل میڈیا ءَ پہ وتی سیاسی، سماجی، لبزانکی، چاگردی گھبودی ءِ ھاتر ءَ کارمرز کن اَنت۔ مروچی سوشل میڈیا انسانی زلورتے جوڑ بیتگ۔ بلوچ ھم بے وس ءُُ گُلامیں راجے ءُُ بلوچ ءَ وت ءَ میڈیا ھم نیست۔ پاکستانی میڈیا بلوچ ءِ ھلاپ ءَ کار ءَ اِنت۔ بلوچ ءِ دزرس تھنا سوشل میڈیا اِنت کہ اود ءَ آ وتی توار ءَ دیم ءَ بُرت کنت۔ بلے تچکیں گپ ایش اِنت کہ بلوچ تنی وھدی چہ سوشل میڈیا ءَ آ کار ءَ گرگ ءَ نہ اِنت کہ آئی ءَ گرگ لوٹ اِیت۔ بگند ئے کہ سوشل میڈیا پہ بلوچ ءَ دنیگا نوک اِنت ءُُ نوکیں چیز ءِ کارمرز کنگ ءَ ردی ھم بیت۔ بلے من ھمے گندگ ءَ یاں ھمنچو کہ اے آسراتی کْوھن تِر بیان اِنت بلے کارمرز کنگ ءِ دْروشم ھما وڑ اِنت۔ باید چوش مہ بیتیں۔
تنگویں بیلاں!
اے سوشل میڈیا ءَ ما وتی ھکّ ءَ کارمرد بہ کن ایں کہ اے پر ما جْوانیں آسراتی یے۔ تئی راجی جنز ءِ سوبمندی ءَ ءُُ تئی جُنز ءُُ لبزانک ءُُ ادب ءُُ سماجی نزوریانی گرءُُ دار کنگ ءِ توجیلے۔ انچوش کہ مروچی بی این ایم ءِ سروک واجہ خلیل بلوچ ءَ کارکُناں پنت دیان ءَ گْوشتگ اَت کہ ’’ما باید اِنت سوشل میڈیا ءِ اندر ءَ بے نپ ءُُ بے سیتّیں باوست ءُُ تْران مہ کن ایں۔ وتی سرجمیں دلگوشءَ گوں راجی جُھد ءَ ءُُ وتی راجی جنز ءِ سوبمندی ءَ گْور بہ کن ایں‘‘۔ اے سوشل میڈیا پہ بلوچ ءَ جْوانیں آسراتی یے (اگاں ما ایشی ءِ شریں وڑے ءَ کارمرز کنگ ءَ بہ زان ایں)۔ باید اِنت کہ سوشل میڈیا بلوچ ءَ وت ماں وت ءَ نزّیک بہ کنت۔ جھدکار گوں یکّے دومی ءَ ھمیشی ءِ وسیلہ ءَ وتی رشتہ ءَ مھکم بہ کن اَنت۔ نوکیں ھال ءُُ اھوال یک دومی ءَ ءُُ جھان ءَ سر بہ کن اَنت۔ بلوچ یک گُلامیں راجےءُُ گُلامیں راج ھر وھد ءَ باید اِنت تپاک ءُُ یک دست بہ بنت۔ بلے ما ھمے گند ایں کہ پہ یک کسانیں جیڑھے ءَ کہ تْران بیت گُڑا بلوچ سوشل میڈیا ءَ گْورجیگ ماں گْورجیگ بنت۔ ءُُ ھمے باوست انچوش دیم ءَ رَوت کہ پہ زاہ ءُُ بد ءَ سر کشّ اِیتءُُ وتی مادنیں کشک ءَ یلہ کنت ءُُ دنیا ھمے ندارگ ءَ سیل کنت۔ تنقید برائے تعمیر جْوانیں عملے۔ باید اِنت کہ تنقید ءِ سر ءَ کس بد مہ بارت ءُُ تنقید ھم پہ ایمانداری بہ بیت۔ کسے گوں کسے ءَ تپاک نہ کنت باکے نہ اِنت۔ ھر کس ءَ وتی پگر ءِ درشانگ ءِ ھک ھست۔ بلے سبکّیں زبان ، بد اخلاقی، ءُُ ناراضی پہ راج ءَ ءُُ راجی جنز ءَ تاوان اِنت۔ بلوچ ءَ اے دْرچ ءَ سک ھیال گْور کنگی اِنت، اوپار کنگی اِنت۔ اگاں کسے ءِ دپ ءَ یا چہ قلم ءَ ردی یے بیت دیم ءِ مردم ءِ باید اِنت کہ چو پُلُّکی ئیں وتاس ءَ آس مہ بارت۔ پٹّءُُ پول بہ کنت ، جُست ءُُ باوست بہ کنت، ءُُ وتی پگر ءَ جْوانیں دْروشمے ءَ دیم ءَ بیار اِیت۔
تنگویں بیلاں!
چاکرؔ ءُُ گْوھرامؔ ءِ کینگاں انگار کن اِت، میرانؔ ءُُ چوٹاؔ ءِ فلسفہ ءَ وتی بہ کن اِت۔ اگاں میر چاکرؔ ءَ میرانؔ ءِ پنت بہ زُرتیں، میر گْوھرام ءَ چوٹاؔ ءِ ھبر بہ گپتیں اے وت ماں وتی سی سالی دْراج کشّیں جنگ نہ بیتگ اَت، ءُُ بلوچ ءَ اِنچو تاوان نہ رس اِتگ اَت۔ اگاں ھیرت چاری بہ کن ئے آ تاوانانی سوب ھمے سوشل میڈیا ءُُ رسانکدرانی ردیں کارمرزی بیتگ۔ ھَیر آ وھد ءَ پیسبوک ءُُ وتساپ ءُُ انسٹگرام نہ بیتگ اَنت بلے آ وھد ءَ بلوچ ءِ رسانکدر شائر بیتگ اَنت، کہ یکّے ءَ میر چاکرؔ ایر جتگ ءُُ دومی ءَ گْوھرامؔ ، یکّے ءَ چاکر ساڑاتگ دومی ءَ گْوھرام۔ ھالانکہ اے دوئیں بامرد بے دروریں بلوچ بیتگ اَنت۔ منی مول ءُُ مُراد ایش اِنت کہ ما ءُُ شُما سرجمیں بلوچ کٹّ ءُُ نپاں سرپد بہ بہ ایں۔ وتی تاوان ءَ ھم بہ زان ایں۔ اے سوشل میڈیا ءِ ھوالہ ءَ وتی راج ءَ دنیا ءِ سرجمیں چست ءُُ ایراں سرپد بہ کن ایں۔ داں کہ راج ءِ زانت ءُُ پگر رُدوم بہ زیر اِیت۔ وتی گُلامی ءَ سرپد بہ بیت۔ اگاں یکّے ءِ دست ءَ ردی یے بیت دومی اوپار بہ کنت پرچا کہ انسانانی دست ءَ ردی بنت۔ بلوچ گْوش اِیت ’’پونز پہ نماز ءَ نہ پْرش اِیت‘‘۔ وتی بْرات ءِ ،ھمبل ءِ اوپار کنگ تئی کدّ ءَ بُرز کنت، جھل نہ کنت۔ تئی کَد ھما وھد ءَ جھل بیت کہ وتی بْرات ءِ، دوست ءِ اوپار ءَ مہ کن ئے۔ مروچی زورگیر ءِ ھیرامنڈی ءِ سپاھیگے بلوچ ءِ گس ءَ دور کنت بلوچ مات ءُُ گْوھارانی بے حرمتی ءَ کنت، بلوچ پُسّگاں آوار جنت ءُُ بیگْواہ کنت ما نشتگ ءُُ چار ایں، پرچا کہ مئے دست نہ رس اِیت، دژمن توانگر تر اِنت بلے اگاں پیسبوک ءَ یا دگہ رسانکدرے ءَ پہ ردی یکے ءِ دپ ءَ ھبرے کپت چہ چاریں نیمگاں تُپنگ ءُُ زھم چست بنت۔ زاہ ءُُ زھیر ءُُ بد اخلاقی ءُُ سبکّیءَ بندات کنت ءُُ بسّی ءِ نام ءَ نہ زانت کہ پہ راج ءَ ،پہ مئے جُھد ءَ،پہ مئے چاگرد ءَ مُولّیں تاوانے۔ مروچی ماں سوشل میڈیا ءَ وتی جنز ءِ بابت ءَ مئے سر ءَ کہ فرعونی زُلمے بیگ ءَ اِنت ، مئے مھلوک کہ مپت ء ناھکّ ءَ بندیگ اِنت ،ما میان استمانی ھلکواں ءُُ میان استمانی انسانی ھکّانی گلاں وتی بے وسی ءَ سر کنگ ءِ جُھد ءَ بہ کن ایں۔ دومی نیمگ ءَ گوں وتی راج ءَ تبلیگ کنگی اِنت ءُُ چہ وتی سماجی جیڑھاں مھلوک پوہ کنگی اِنت۔ ءُُ وتی مھلوک ءَ زانت ءُُ شعور دیگی اِنت۔ راجے کہ زانت ءُُ شعور ءِ واھُند بیت گُڑا آ گُلام دارگ نہ بیت۔ مارا لبزانک ءُُ ادب ءُُ دود ءُُ ربیدگ پلگارگی اَنت۔ مئے وتی راجی جیڑہ سک باز اَنت کہ دلگوش گْور کنگ لوٹ اَنت۔ ما وتی وھد ءَ وتی زور ءَ بے نپیں ءُُ بے مکسدیں بُنگپّانی سر ءَ زوال مہ کن ایں۔ اے سوشل میڈیا جْوانیں آسراتی یے۔ مروچی وتساپ گروپاں من بلوچ ءِ جزباتاں گنداں دل وش بیت۔ من وت ھم یک ءُُ دو وتساپی گروپاں ھواراں شپ داں روچ بلوچ ءِ لبزانک ءِ سر ءَ، بلوچ ءِ دود ءُُ ربیدگانی بابت ءَ، بلوچ ءِ گْوستانک ءُُ بلوچی ءِ گار ءُُ بیگْواھیں لبزانی پٹّ ءُُ پول ءُُ بتل ءُُ چاچ ، گیدی کسّہءُُ بلوچ ءِ چاگردی گھبودی ءِ بابت ءَ ، بلوچ راجی جنز ءِ بابت ءَ گپ ءُُ تْران اِنت، جُست ءُُ باوست اِنت۔ من ھمے سرپد باں کہ اے مزنیں بدلی یے ءُُ بازیں جاھاں بلوچ سوشل میڈیا ءَ وتی ھکّ ءَ کارمرز کنگ ءَ اِنت بلے ھمنچو کہ گیشتر بیت ما چہ رسانکدراں جْوانیں رنگے ءَ کار بہ گر ایں ءُُ وتی راجی زمّہ داریاں پیلہ بہ کن ایں۔
تپاکی آجوئی ءِ مانزمان اِنت
بلوچستان آجو بات
***
