دْروت پہ شُما
شُما وش ءُ جوڑ اِت۔ منی دُوا اِنت شُما وتی وشّی ءِ مُراداں بات اِت ءُ ھِچّ وڑیں سکّی ءُ سوری، گرمیں گْواتے شُمئے گوناپ ءَ مہ لگات۔ ءُ شُما دِل تپرکہ مہ بہ اِت، بلکیں من ھستاں ءُ شُمئے ھمراھاں۔
منی دیدگ! ( یلان جان ءُ ےتلاہ جان )
سنگر ءِ تہ ءِ کُنگریں بلوچ ءِ بچّ شُمئے پتی جاہ ءَ پِت ءُ بْراتی جاہ ءَ۔۔۔۔۔۔۔۔۔۔۔دانکہ یک کُنگریں بچّے سنگر ءَ نشتگ شُما وتارا بے وارِس سرپد مہ بہ اِت۔۔۔۔۔۔۔۔
اے راہ ءَ کہ من وتی ھون رتکگاں، اے راہ شُمئے ءُ سرجمیں بلوچ راج ءِ وشیں باندات ءِ راہ اِنت۔ آ مِنزل نوں دُور نہ انت کہ مئے آجوئی ئیگ اِنت۔
منی دیدگاں!
من زاناں شُمارا بے من ءَ الم وش نہ بیت ءُ سک زھیر کنت، من ءَ اُوں سک زھیر بیت۔ من گْوشت شُما منی ساھگ ءَ بہ رُد اِت ءُ مزن بہ اِت، بلے زمین ءِ مھر اَنچو توانگر اَت کہ من ءَ وتی نیمگ ءَ کش اِت ئِے ءُ دگہ نیمگ ءِ ھِچ موہ ءِ نہ دات، پرچا کہ زمین ءِ مھر چہ سِھر ءَ ھم ھما دیمتر اِنت۔
پد ءَ یک گپّے اِیش اِنت کہ زمین مئے ، شُمئے دُرستانی مات اِنت۔ مات ءِ ھاتِر ءَ مارا شُمارا دُرستاناں وتی پرز پیلو کنگی اِنت، اے منی پرز بوتگ ءُ من پیلو کتگ۔ بلے اِنشالّا پہ شُما اے نوبت نئیت ءُ شُما زُوت وتی گُلزمین ءِ سر ءَ پہ اِیمنی ترّ اِت ءُ اے لجوزانی نوں بام ءَ جورکان داتگ۔
منی مکھیں مات (ھیر بی بی)!
من زاناں تو منی رَوَگ ءَ سک بے چاڑ ءُ مُلور ئے، بلے بے چاڑ مبو۔ تھنا من تئی یکُّو نہ بوتگاں، بلکیں بلوچ ءِ ھر بچّ تئی بچّ اِنت۔
اگاں ترا پمّن زھیرے کُت، تو سرمچارانی تُوپکّ ءِ وشیں توار ءَ گُوشبدار ءُ وت ءَ ساکم بِہ کن، پرچا کہ اے تیرانی توار منی کندگ اَنت۔ منی کسانی ءِ ناز اَنت۔ بارودانی شورہ ءُ بوہ منی جان ءِ وشبو اَنت۔
منی بانکیں گْوھاراں!
زینت جان ءُ ھیال جان پریشان مہ بَہ اِت کہ من زاھِری رنگ ءَ چہ شُما جتاھاں، بلے گوں شُما دائم ءَ ھمراہ گوناں۔۔۔۔۔۔۔۔۔۔۔۔
منی ھمپگریں بیلی شُمئے بْرات اَنت، شُما وتارا بے بْرات سرپد مہ اِت۔ اے راہ ءَ ھزاراں ماتانی بچّ، گْوھارانی بْرات، بچّ ءُ جِنکّانی آریپیں پِت، جنانی جود جتا بوتگ اَنت۔۔۔۔۔۔۔۔۔۔
منی زندگی ءِ ھمسپر!
منی ماھیں لوگبانک نورجان منی رَوَگ ءَ من زاناں تو تکانسر بَہ ئے، بلے وت ءَ پریشاں مہ کن ءُ گل ببو۔۔۔۔۔پرچا کہ مرچی تو یک شھیدے ءِ لوگبانک گْوشگ بَہ ئے۔ من لوٹ ات ترا گوں پُر مھریں زِندے بِہ گْوازیناں، چاھڑ ءُ تبدانی دیم ءَ بہ اُوشتاں، یلان جان، تِلاہ جان ءِ وشّیانی روچاں بِہ گِنداں۔ آھاناں وتی ساھگ ءَ مزن بُوَگ ءَ گوں وتی چمّاں بِہ گِنداں۔بلے چے کن ئے! راج درامدانی ایردست اِنت، ھزاراں ماتانی بچّ ،گْوھارانی بْرات، چُکّانی پِت، جنانی جود، بیگواہ اَنت۔ اے وڑیں نوبت ءَ مردُم چون وتی سر ءَ ساٹ اِت کنت۔ سلامت بات اِت، دائِم ءَ وشّیانی نود شُمئے سر ءَ ساھیل بات اَنت۔۔۔۔۔۔۔۔
من شمئے وتی بالی دوست
***
