وت چیزے نہ زان اَنت ناں دگر ءَ وار دے اَنتیں
گوں کازی ءُ مُلّایاں من ءَ دوست سلام اِنت
بشیر بیدار
مُلّا ءُ مسیت بلوچ چاگرد ءِ تہ ءَ کارستے۔ بلے من آ کسّہ نیاراں۔ پرچا کہ مولانا ھدایت رھمان ءَ باریں چُنت سال ءَ پد ھمے کارست پد ءَ زندگ ءُ نوک کُت۔ جمائت اسلامی ءُ بوٹ والایانی ردوم داتگیں پروگرام ھک دو تھریک مولانا ساھب ءَ وتی کوپگاں زُرت۔ راجی جنز ءِ پْروش دیگ ءِ ھاتر ءَ اے نوکیں اسلامی سلوگن دیم ءَ آؤرت۔ اے ناروائیں امل پہ بلوچ راج دوستاں ءُ رُژنا پگریں مھلوک ءِ واست ءَ بلاھیں پندلے اَت۔ ھر کس ءَ زانت کہ جمائت اسلامی بلوچ ءُ انسانیت ءِ ازلی دژمن اِنت۔ الشمس ءُ البدر ءَ دیر نہ گْوستگ کہ بنگلادیش ءَ ایشاں کجام دیم سیاھی کُت۔ ھزارانی ھساب ءَ اشاں بنگلادیش ءِ مھلوک کُشت ءُ گار کُت۔ پرچا کہ بنگلادیش ءَ وتی آجوئی ءِ لوٹ کُت۔ جمائت اسلامی آجوئی لوٹوکیں مھلوک ءِ ھر وھد ءَ ھلاپ بیتگ ءُ وھد ءِ زالم ءُ جابریں سرکارانی پلامرزی ئِے کُتگ۔ ھمے ھاتر ءَ مُلّا ءَ بندات ءَ لھتیں ایشوزانی سر ءَ وتی جُھد بندات کُت۔ چہ اد ءَ بازیں مردماں رد وارت۔ پرچا کہ ایشوز و ھست اَنت۔
من ءَ سنگتے ءَ گْوشتگ اَت کہ ” واجہ ھمے وھداں کہ ملا ھدایت ءَ کوکار بندات کتگ۔ گڑا یک روچے سُربندرءَ جمیئت اُلمائے گوادر ءِ لیڈرے مئے دپتر ءَ اتکگ آئیءَ گْوشتگ کہ من ٹیکداری ھم کناں گوادرءِ آرمی ءِ کرّ ءَ منی رو ءُ آ ھم ھست انت من ھمایانی کرّ ءَ ٹیکداری کناں ٹینکراں چہ آپ پجاریناں گڑا ھمے مرد گْوش اِیت کہ آرمی ءَ من ءَ گْوشتگ شما اھتجاج ءُ درنا پرچا نہ دے ئے ھرچی کن ئے ما سپورٹ کنیں اشاں لوٹ اِتگ کہ مزھبی جمائت دیم ءَ بہ رو انت. مرد گْوش اِیت من گْوشتگ گوں من نہ بیت. اے گپ ءَ ماھے پد ملا ھدایت ءِ درنا ءُ زھرشانی بندات بوتگ انت۔
نی چو کے ءَ زانت کہ "پِیلّ ءِ پیشدارگ ءِ دنتان دگر ءُ ورگ ءِ دگر اَنت” اسل ءَ مُلّا ءِ چیر ءُ اندری ءِ بُنُکّی مول ءُ مُراد ءُ لوٹ ءُ واھگ دگر اِت اَنت۔ بُرز ءِ واجکاران ءُ پریشتگاں اد ءَ جمائت اسلامی ءُ مُلّا دیم ءَ آرگی اِت اَنت۔ کہ مولانا وتی شھدیں زبان ءَ گْوشگ ءَ اِنت کہ "شُما (بلوچ) جمائت اسلامی ءُ سراجُلھک ءِ دستاں مھکم بہ کن اِت۔ گُڑا بلوچستان سبز ءُ آباد بیت” بندات ءَ مُلّا ءَ چشیں گپ نہ جتگ اَت۔ مولانہ ساھب! جمائت اسلامی ءَ روگ پہ بلوچ ءَ ناھودگیں زاھے۔
مُلّا! بلوچ گْوش اَنت "روگن رچ اِیت بلے نَے نُھ مَن۔”
لس مھلوک سرپد اِنت کہ جمائت اسلامی بلوچ ءِ دوزواہ نہ اِنت۔ بلوچ ءِ گار ءُ بیگواہ کنگ ءِ سرکاری پندلاں ھوار اِنت۔ بلے برے وھدے تہ ءِ گپ پہ نزانتکاری در کَیت۔ مُلّا ءَ مُدام گْوشتگ اَت کہ من ھک دو تھریک ءِ واست ءَ کار ءَ آں۔ بلے تہ ءِ گپ ءُ اھوال دگر اِت اَنت۔ اسل ءَ مُلّا ماسی زینی ءِ نان ءَ جت۔ کہ وتی اسلی مکسد ئِے درشان کُت ءُ گْوشت ئِے کہ بلوچ جمائت اسلامی باسک جوڑ بہ بہ اِت ءُ وتی تباھی ءُ بربادی ءِ سبب شُما وت بہ بہ اِت۔ بلے بل ایشی ءُ بگر آئی ءَ کہ مُلّا ءَ بلوچ وانندگانی بابت ءَ بے بُنیں بُھتام سازی کُت کہ بلوچ وانندگ پہ وانگ ءُ زانگ ءَ نہ رو اَنت بلکیں پہ اشک ءُ آشکی ءَ رو اَنت۔
اڑے مُلّا! ترا بلوچ زھگانی ھک بہ جنات اَنت کہ تو بلوچ راج ءِ نیاڑی ئیں جنین زھگاں اے دابیں بُھتام بند ئے۔ تئی دپ چتور گیپت۔ تئی زرد ءَ اے گپ چوں منّ اِت؟ بلے ھو کہ تئی زرد مُرتگ۔ اد ءَ تئی مکسد ایش اِنت کہ بلوچ چہ زانت ءُ زانگ ءَ دیر بہ بنت۔ اے گپ ءَ چہ پیش کمّو لج بہ کُتیں کہ تو کے ءَ زاہ دیگ ءَ ئے؟ تو لس بلوچ مھلوک ءِ زھگاں نیاڑیاں زاہ ءُ بد کنگ ءَ ئے۔ اگاں دگہ راجے بوتیں تئی زبان ئِے چہ لِلّ ءَ کشّ اِتگ اَت۔ بلے بلوچ باز اوپار کشّیں راجے کہ تو دنیگا زندگ ئے۔
لس مھلوک ءَ زاہ ءُ بد کن ئے۔ ترا اے سرٹیپکیٹ کے ءَ داتگ؟ تئی واجکار ءُ ھُدابُندانی لوٹ ءِ پد ءَ تو بلوچ ءَ زاہ ءُ بد کن ئے؟ وتی پگار ءَ گیش کنگ ءِ ھاتر ءَ بلوچ ءَ جَھل جن ئے؟ تو وت چے ئے؟ بلوچے نہ ئے؟ چوناھا ھما بندات ءَ مئے چیزے سنگتاں ترا زانت۔ بلے ما شُومّ ءُ شانزدہ بیتیں ترا بندات ءَ نہ زانت۔ سنگتاں پہ جار ء بادشاھی گْوشت کہ اے مرد پلانٹڈ مردمے۔ جمائت اسلامی ءُ بوٹ والایاں اے مردکار رنگ ءُ روگن کُتگ ءُ مھلوک ءِ دیم ءَ آؤرتگ۔بلے اپسوز کہ ما نہ زانت۔ مبارک کازی دیر اِنت گْوشگ ءَ اِنت کہ اے مُلّا دو نمبرے۔ بلے اے ملنگ تبیں شائر ءِ گپ کس ءَ دلگوش نہ کُت۔ بلے اپسوز ءِ گپ ایش اِنت کہ ھسین واڑیلا ءِ دابیں ایمانداریں سیاستدانے ءَ ءُ اے دگہ بازیں رژنا پگریں ورنایاں ھم رد وارت ءُ وت ءَ گوں مُلّا ءَ پیڑات۔ بلے مُلّا! بلوچ گْوش اَنت کہ
"بنگاں مہ ور ایمن مہ بی
ورنا تئی پاس ءَ چر اَنت”
بلوچ ءِ پھک دلی ءَ نزوری یا پھوالی سرپد مہ بی۔ نی ترا اد ءَ بلوچ ءَ زانتگ۔ نی تو دیر نہ کن ئے۔ تئی راز راج ءِ دیم ءَ آؤٹ بوت اَنت۔ گوادر ءِ مھلوک سکّیں راج دوستیں مھلوکے ءُ گْوادر میر ھمل جیئند , سید ھاشمی , میر گوس بکش بزنجو , میر ھسین اژرپ , شھید نواب اکبر ھان , سردار اتا اُلّا مینگل, شھید مھبوب واڑیلا , شھید ماسٹر ابد رھمان آرپ , شھید کامریڈ کیّوم ءُ اے دگہ راج دوستانی سنگر اِنت۔ بلوچ گْوش اَنت کہ
"کوہ پُلنگانی گپتگیں پاسگاہ
تولگ ءُ روباھی نہ بنت وابجاہ”
بلے اے بلوچ ءِ دلپھکی بیتگ کہ تئی پندل ئِے کِمار نہ کُتگ۔ اد ءَ من گوں گْوادر ءِ کُلّیں راج دوستاں , رُژناہ پگریں سنگتاں گوں گْوشگ لوٹاں کہ شُما ھم بے میار نہ اِت۔ شُما وھدے کہ گراؤنڈ ءَ ھُورک ءُ ھالیگ کن اِت گُڑا ھر کس کَیت لَیب کنت۔ شُما وتی تپاکی ءَ کہ پروش اِت گُڑا اے وڑیں ناسور ھم سوبمند بنت۔
مولانا ساھب ءَ دگہ جیڑھے ھم اورماڑہ ءَ بندات کُتگ۔ (اے و تچکیں گپّے کہ مُلّا وھدے کہ گرگ بوتگ اَنت یا آیانی پندل زانگ بوتگ گُڑا آیاں مدام مزھب ءِ کارڈ کارمرد کُتگ). زگری ءُ نمازیانی دینانی بابت ءَ۔ مُلّا من ترا گْوشگ لوٹاں کہ اے وڑ ھم وت ءَ را دَور مہ دے کہ چو ڈونڈ ءَ رند ءَ چِنَگ مہ بہ ئے۔ اے باز ترسناکیں پندلے۔ بلوچ ءَ وت ماں وت ءَ جیگ ماں جیگ مہ کن۔ بلوچ ءِ تپاکی ءِ پْروشگ ءِ بے سوبیں جھد ءَ مہ کن۔ بلوچ گْوش اِیت کہ
"لوگ ءَمہ سوچ کہ پُر ءَ ھرید اِنت”
ءُ بلوچ دگہ گپّے ھم گْوش اِیت۔
"اسپَنتان وتی کدّ ءَ رُد اِیت۔کدّ ءَ آ دیم بَوک ئِے گیپت”
بلوچستان آجو بات
بلوچ ءِ دژمن سرنگُون بات اَنت
***
