رملچّہ
زمین دُزّ اِتگ آزمان دُزّ اِتگ
تَورات ءُ انجیل کُران دُزّ اِتگ
دھر ءِ تمردیں زوراوراں
منی زند ءُ شھدیں زبان دُزّ اِتگ
منی زِرزمین ءُ منی ھپت تلار
منی ونڈ ءُ بھر ءُ نکان دُزّ اِتگ
منی راجی دود ءُ ربیدگ گُلیں
چہ گْوھاراں بْرات ءِ نِوان دُزّ اِتگ
مات ءُ پت ءِ مھر چہ کودکاں
کاڑانی ننگ ءِ گُشان دُزّ اِتگ
بُزگَل ھاریں گُرکاں ڈَل اِت
دھر ءِ لگوراں شِبان دُزّ اِتگ
سُھرانی ھمبار، مڈّی ءُ مال
مئے زیر زمین ءِ تَوان دُزّ اِتگ
بے سوب چہ زند ءِ ھمک وشّیاں
کتاب ءُ کلمّ ءُ کَمان دُزّ اِتگ
شپاں واب ءُ آرام نَے روچاں کرار
منی ایمنی ءُ امان دُزّ اِتگ
گْوھارے زر اِیت پہ بْرات ءَ وتی
ماتے پہ بچّ ءَ وتی تنگویں
پیریں پتے پریات کنت
بیگْواھیں بچّ ءَ مُدام یات کنت
لوگبانکے پہ جود ءَ وتی
کسانسالیں زھگے پہ پِسّ ءَ زر اِیت
نشتگ دَگانی سر ءَ ماھلے
ارسان گْوار اِیت پد ءَ ھانُلے
پد ءَ پادشپاد اِنت گُلیں گْرانلے
تیرانی آماچ دگہ اِزگُلے
پریات کنت دست بند اِیت گوں ھمُک رھگْوز ءَ
پرچا ازاب ءُ در پہ در آں
چو دِرتہ پُچّ ءُ چے ءَ سردر آں
مات مکّھیں بے گَندل ءَ
بے ساھگ ءَ گرم ءِ جل ءَ
مات ئِے کُتگ چہ بچّ ءَ جتا
دشتار نہ زانت کہ منی نام گِپت کُج ءَ
زلمانی کارست شموشگ نہ بنت
دیم سیاھیں کِرد ءُ تئی داسپان
زِردانی ٹپ مدام تاجگ اِنت
شھیدانی وھدے کپ آں تْرانگاں
گُل جان ءُ شیر جان مُنیر بزّگیں
مُرگاپ ءِ تلّاں لاش کپتگیں
گوں تیزاپاں تْرندیں جان شُشتگیں
چہ بالگرداں بُرز ءَ چگل داتگیں
رسول بکش مینگل یات اِنت من ءَ
مرگ ءَ چہ پد جون پاھو داتگیں
دلبند گوں کارچاں نبشتہ کُتگ
بُگٹی شھید مئے نواب مھتریں
راجی کماش منی گْرُھبریں
ناموس ءُ ننگ ءِ سپاہ مردوریں
شھید کُت ٹیکاں پیراں سری
ارداچ کُتگ چانیگ گریں لشکر ءَ
مُلّا مُلُوک بگٹی ءُ سمد لاسی ءَ
لانت ایشانی ٹپّاسی ءَ
ڈَھور دات کبر ءَ بے وارس ءُ بے مونس ءَ
دلوں لھڑ جنت، پاھار کنت بسّ اِنت لگوری منی ھمبلاں
پاد ءَ چہ واب ءَ در ءَ گندلاں
گُلامی ءِ لوپ ءَ لگوش گردن ءَ
زلمانی مُھریں بہ پْروش سانکل ءَ
زلمانی مُھریں بہ پْروش سانکل ءَ
