رملچّہ
(راجی ءُ آشوبی شائر سنگت منزور بسمل ءِ نام ءَ)
میجر مجید
شائری سے تھر اِنت بلوچانی
چاکری اھد ءُ نوبت مُلّائی
نوگیں رنگ وشّیں شَیر ءُ گالانی
ھر یک دھرے مئے زند ءِ آدینک اِنت
مانزمان اِنت راجی کِردانی
راجی پجّار ءُ جْوانیں دودانی
دپتر اِنت راج ءِ لڈّ ءُ بوجانی
مڈّی ءُ بُنمال راجپھازانی
جیڑہ چاگردی کسّہ جنگانی
دِلّی ءِ جنگ ءَ کَنّو گوکپروش ءِ
سردار بلوچ ھان ءُ میر ھیاتان ءَ
گوں اے دگہ راجی شیریں بامرداں
مرگ اِش امباز کُت ھاتر ءَ ننگ ءِ
زندگ اَنت ارواہ مئے شھیدانی
شیر مھمد تالپُور ڈَبّو ءِ جنگ ءَ
ھوش مھمد شیدی لشکر ءِ سرھَیل
جنگ اِش گوں مُلک گیریں پرنگان اَت
ءُ میانی ءِ جنگ ءَ پَلّو اِش بستگ
دیم پہ دیم زھمانی توار رُستگ
لَڈّ ءُ بوج گْرانیں میر بلوچانی
ھار ءُ ایروپ ءُ شرتگ ءُ تُوپان
ھامین ءُ ایرَھت رون ءُ موشانی
کَھت ءُ ڈُکّال وشّیں روچانی
دْرچک ءُ دار، مُرگ ءُ موسم وھدانی
مھر ءُ دوستی ھانی ءُ مُریدانی
اِزّت ءُ مِھرُک درد ءُ رَنجانی
سُتکگیں پیردان انگت پُرسیگ اِنت
سَسّی ءُ پُنّو پُتْر ءُ ھوتانی
ھاران ءِ جتّو رھیم بکش نامانی
شھداد ءُ اومَر مھناز دابانی
توکلی مست مئے ملنگانی
سِیمُک بانور اِنت بلے گُد جنوزامی
مھر ءِ ارجان بیت نتّا سالونکیں
لَلّا ءُ گراناز اھد ءُ کَولانی
پاتُما آلی بیر گیرانی
آدینَگ وَیدی چیدگ جنگانی
شِیرو ءُ آدم میرو نامانی
کِیّا ءُ سدگنجیں سدوّانی
گْراناز ءُ بیبگر بُو زبادانی
میر کلیر اِنت ءُ ھاجِر دابانی
کیچ ءَ لال بی بی اومر ءُ ماھُو
زندگ اَنت دائم مریم ءُ شاھُو
میر تلانگ جنگانی سپاہ مَلّیں
بی بی گنجی گوں توکل ءَمردی
بانڑی شیریں رابیا ھُزداری
زالبولانی کرد جنگانی
بی بی لالین گوں جَوزگاں شیری
بچّ ئِے بکشات اَنت میار جلّیں
سد سلام اِنت اے کمبر ءِ مات ءَ
زندگ ءُ مان اِیت دپتر ءَ راج ءِ
بالاچ بیرگیر ءُ کمبر نامانی
نکیبو گوں گونچان ءُ سُھر سریں تیراں
گاری ءَ نیل اَنت گوں دژمناں بیراں
ھمّل ء جیئند جنگ پرنگانی
چاکر ءُ گْوھرام راجی بامرد اَنت دپتر ءَ راج ءِ
گوھر ءُ شدر اَنت
اے کُل مئے اھدی شائری داد اَنت
نُگرھیں داسپان تنگویں راج ءِ
چوں شموشگ بنت دپتراں ڈیھ ءِ
مرزبوم پُلّیں تاں بلوچ ھست اِنت
زندمان ھست ءُ داں زبان ھست اِنت
داں بلوچانی سرڈگار ھست اِنت
راجی بامرد ماں دپتراں ھست اَنت
مُلّائی اھد ءِ شائری مئے گْوست اِنت
چاکری دھر مئے سلّھیں آدینک
شائری نوکیں مئے آکِبت جْوانیں
تنگویں گال ، لال ءُ مُروارد
تْرونگلیں تْرمپانی گسدگْوار اِنت
مرچی مئے گال گنج کہ سپھدار اِنت!
کُل مئے اَھدی شائری بھر اِنت
پنت، تپاکی ءُ دوستی ءِ سوگات
شائری دْروشم بلّے سے تھر اِنت
ھر کجام تَھر مئے راج ءِ جھگیر اِنت
پہ زبان دوستاں شکّل ءُ شِیر اِنت
پہ زبان دوستاں شکّل ءُ شِیر اِنت
