کُرونا …. میجر مجید

رملچّہ

کُرونا اِلّتے کپتگ جھان ءَ
گْوش ئے تیرے کہ سْرپتگ چہ کمان ءَ
لپاشان اِنت مئے ھلک ءُ میتگان ءَ
کُشان اِنت ھوا ءُ آدم ءِ اوبادگان ءَ
چہ گْوات ءَ تیزتر اِنت گْرند ءُ گروک ءَ
گْوش ئے آسے بُن اِنت ماں کِشوران ءَ
جھان سوچیں اے بمبے یا کہ کھرے پہ ھدا ءِ بندگان ءَ
جھان کُلّیں پتاتگ ماں وتی سیاھیں گُشان ءَ
چین، امریکہ، جاپان تاں پرنگ ءِ ھلکوان ءُ تاں کیچ مکران ءَ
شال، ھلمند ءُ بولان ءُ دُزّاپ
کسرکند ، جاشک تاں کِیر ءُ بِیر ءَ
منی بمپور ءِ مسکیں کھچران ءَ
یورپ، ھندُستان، ھلیج تاں روم ءُ شام ءَ
نے چہ روس ءَ بیمّے دار اِیت
نَے چہ واجہ امریکان ءَ
نَے کہ پاسپورٹ لوٹ اِیت
نَے کہ ویزا ئِے پکار اِنت
دل بہ لوٹ اِیت ھر کج ءَ
پْروشان اِنت مُھریں سیمسران ءَ
نَے کہ بکش اِنت مئے گریب ءُ بزگران ءَ
نَے کہ میر ءُ واجھان ءَ
نَے کہ ھاکم نَے کہ سردار
نَے تمنداریں سران ءَ
دم جنت مُلّا ءُ وان اِیت کُران ءَ
بلے گیش بیان اِنت روچ پہ روچ سھت ءُ دمان ءَ
پیریں کماش ءُ نَے زالبولاں
نَے ورنا ءُ کسانیں کودکان ءَ
لپاشان اِنت کُشان اِنت آدم زات ءَ
دل ئِے اومان کنت گرد اِیت گوں گْوات ءَ
چہ گراب ءَ تیزتر اِنت چہ باد ء سر سر
چو گِروک ءَ شھم کنت ھر کُنڈ ءُ کشور
نَے دارو ئِے دار اِیت
نَے سیچن ءُ درمان تبیب ءِ
نَے مُلّا ءِ بند ءُ تائید
نَے گْواتی ءِ چائُوشّ ءُ کُفّار
نہ تُرس اِیت چہ ھدا ءِ کدرتان ءَ
نَے چہ تپنگ ءُ ٹوپ ءُ بمب ءِ کھریں ھیبتان ءَ
اے چتوریں دھرے آتکگ ماں جھان ءَ
زال وتی جود ءَ شِزار اِنت جود چہ ھاتونیں جن ءَ
سرشپانی مھر ءُ دوستی
نیم شپانی لیب ءُ گْوازی
ٹیٹلانی گرمیں امباز شُت اَنت
ماھلانی مھپرانی ساھگ ءُ
مَنّویں ساچان شُت اَنت
وپت ءُ واب ءُ بُو ءُ باس ءُ
نرمیں گُلائیش شت اَنت
بینَگیں رکّانی تام ءُ لزّت ءُ
وشّی شُت اَنت
پِت چہ چُکّ ءَ ھَوپ کنت
چُک چہ پت ءَ
ھر کس ءَ تُرس اِیت دومیگ ءَ
کس نہ زانت گون اِنت کَے ءَ
سیری شادِہ پُرس ءُ پتّر
مجلس ءُ دیوان شُت اَنت
ھمساھگ ءُ سیاد ءُ وارس
ھر کس ھوزم اِنت ماں وتی جند ءِ گس ءَ
دوست چہ دوستاں بیتگ اَنت پھک ءَ جتا
سالونک چہ بانور ءَ ھز اِیت
بانور چہ سالونک ءَ تچ اِیت
ھر کس ءَ دَپُکے دپ ءَ اِنت
چو نَولّیں کائیگر ءَ
مئے مسیتانی نماز ءُ ھجّ ءُ تاھت ھم شُت اَنت
ھانہ ءِ کابہ ، کلیسا، مندر ءُ
زگرانوانی چاپ ءُ چوگان ھم شُت اَنت
یا ھُدا تو وت ھلاس کن اے نہ وشّیں مھنتاں
بیار پد ءَ رژنے جھان ءَ چہ وتی گنجیں دراں