ساچکار: میجر مجید
مہ ترس چہ ہار ءُ ایروپاں
مہ ترس تُوپان ءُ سیاہ گْواتاں
مہ ترس چہ دہر ءِ زوراکاں
اے آجوئی ءِ سوگاتاں
اے تئی ٹوہینگ ءَ کاینت
تئی جنزینگ ءَ کاینت
ترا جہد ءِ سکین ءَ دنت
گُلامی ءِ بدیں مارشت
ترا تژن ءُ شگانے جنت
گوں مردی توکل ءَ پادا
سْرین ءَ بند
وتی ہوناں گوں کشکے رند
تئی پیرین ءُ ورنایاں
تئی اے مکہیں ماتاں
تئی ڈیھ ءِ ملکنازاں
تئی کلثوم ءُ گُلنازاں
تپاکی ءِ سکین ءَ دنت
وتا چو بالو ءَ ماندار
بلین رُژنے جہان ءَ بیار
اے تُوپان ءُ لوار تْرندیں
اے نوکیں زند ءِ مستاگ انت
اے رُژن ءِ سُہریں استال انت
مہ ترس چہ ہار ءُ ایروپاں
پہ نوکیں زند ءِ شوہاز ءَ
وتی آجوی ءِ فکر ءَ
وتی وتواجہی جہد ءَ
پہ تو اے مادنیں راہے
گْوزنت ہمبل چمے راہ ءَ
ہمے تئی منزل ءِ راہ اِنت
ہمے تئی چاردہی ماہ اِنت
ہمے وابانی بانور انت
بچار سَیل کن تو آزمان ءَ
وتا گندئے، منا گندئے
بلوچ ءِ پُسگ ءَ گندئے
شہید ءُ راج پہازاں المّا گندئے
شُمارا گندگاآں من
ماں استالانی دیوان ءَ
شمارا من ماں ماہ ءِ سرا گنداں
شمارا عرش ءُ کُرش ءَ گندگایاں من
شمارا کلکشان ءَ گندگاآں من
شمارا اگرب ءُ پورانی پیما گندگایاں من
اے ہار ءُ شرتگ ءُ تُوپان
نہ ماننت دائم ءُ قائم
نہ ماننت المدام پہ تو
وتی اے پْرشتگیں بوجیگ
کتگ چولانی باہوٹ تو
بہ کش آچار ءَ بوجیگ ءِ
زَراب دئے رُستگیں چولاں
نیلبومیں زِر ءِ چاک کن دلبند ءَ
تیابے پہ وتا شوہاز
زمینے پہ وتا نامین
