میجر مجید
منی راج ءِ دگہ روکیں چراگے ایر مُرتگ
زمین ءُ آزمان زاراں سرا زُرتگ
پُلئت چہ ما دگہ سوگاتیں بچّے
ترا ہم ملکموت ءَ زور بُرتگ
زمین تپتگ پہ مئے راج ءَ مُلوکیں
چو نود ءَ شنزتگ ارساں شلوکیں
پدا ارسیگ ءُ پُرسیگ انت منی راج
پدا گِلّوتگاں گپتگ منی راج
پدا ارس شلان انت دیدگاں مئے
میار جلّی ءُ نان شانی
چہ تو کس ءَ نہ بُرت باج
تْران توسی ءُ راجدوستی
تئی اَیسی سر ءِ تاج
ادا باز انت سرکاری سردار
امیر ءُ میر ءُ پنڈوکیں تَمندار
زوریں حاکم ءُ زوریں جمادار
راج ءِ حق زِیریں چیریں سْیہ مار
پہ چرپیں وانے ءَ سرکار ءِ چمدار
کُج اِنت حمیداللہ منی آ راجی سردار
بلوچ ءِ درد ءُ دورانی شریدار
منی لبزانک ءِ کوّاس ءُ کلمکار
ادب دوست، زبان دوست ءُ شرپدار
بلوچ ءِ چیدگیں دودانی پاسدار
گْران ءُ سنگینیں دیوانانی بْرہدار
جتا بیتگ چہ ما یک راج پہازے
سید خان ءِ وڑیں مہماں شُناسے
چو نوابیں اکبر ءَ یک سربلندے
پہ راج ءَ بیرگیں تاوانے مُلّیں
چہ دُزاپ ءَ ءُ بولان ءُ نہنگ ءَ
گماں تَھ پْروش میریں سرمَتاب ءِ
حمیداللہ مئے شیریں جَور جواب ءِ
منی راج ءِ سِپاہ ءُ نام ءُ ننگ اَت
مدام ڈیھ ءِ بدیں زوراکاں جنگ ات
گریب ءُ بزگر ءِ گموار ءُ ننگ ات
تہاریں سیہ شپانی دْرین ءُ سنج ات
کسرکند، گْوادر، تاں دشت ءُ کیچ ءَ
گمانی جمبر ءَ گْورتگ سدیچ ءَ
دگہ میر کمبرے بیران بیتگ
بہ بیت کَے پاسپان رہنیں سرانی
کَے اِنت موکیت بلوچ ءِ نام ءُ ننگ ءَ
چہ دہر ءِ زالمیں مہراب لنگ ءَ
کپوتاں نالتگ دوشی ماں دْرنگ ءَ
نمیران ءُ ابدمان انت مئے راج سردار
چو روچ ءَ روژنا انت دُرسیں کردار
جہاں است انت تئی ہم نام مانیت
سباہ ءُ تلملیں بامسار مانیت
