اسرائیل اور غزہ کے درمیان جنگ بندی کے معاہدے کے تحت حماس نے تین اسرائیلی یرغمالیوں کو ریڈ کراس کے حوالے کر دیا ہے۔ ان کے بدلے میں اسرائیل 360 سے زائد فلسطینی قیدیوں کو رہا کرے گا۔
حماس کی جانب سے ان تین اسرائیلی یرغمالیوں کے نام گذشتہ روز ہی جاری کر دیے تھے جنھیں آج رہا کر دیا گیا ہے۔
ان مغویوں کے نام نام الیگزینڈر ٹروفانوف، یائر ہارن اور ساگوئی ڈیکلچن ہیں۔
فلسطینی قیدیوں کے انفارمیشن آفس کے مطابق ان تین مغویوں کی رہائی کے بدلے میں اسرائیل غزہ کے 333 قیدیوں کے ساتھ عمر قید کی سزا پانے والے 36 فلسطینی قیدیوں کو بھی رہا کرے گا جنھیں سات اکتوبر 2023 کے بعد گرفتار کیا گیا تھا۔
مغویوں کی رہائی کے عمل کو مکمل کرنے کے لیے ریڈ کراس کی تین گاڑیاں خان یونس پہنچی تھیں۔
حماس نے ان یرغمالیوں کو ریڈ کراس کے حوالے کر دیا ہے جس کے بعد ریڈ کراس ان تینوں کو غزہ میں اسرائیلی فوج کے حوالے کرے گی۔ پچھلے ہفتے یرغمالیوں کی حوالگی کے وقت کے برعکس اس بار ہجوم کو دور رکھا جا رہا ہے۔
یاد رہے کہ اسرائیل نے کہا تھا کہ اگر ان تینوں یرغمالیوں کو بروقت رہا نہیں کیا گیا تو وہ حماس کے ٹھکانوں پر دوبارہ بمباری شروع کر دے گا۔
اسرائیلی انتظامیہ کی جانب سے یہ انتباہ حماس کے اس بیان کے بعد سامنے آیا تھا جس میں حماس نے کہا تھا کہ وہ اسرائیل کی جانب سے جنگ بندی کی مبینہ خلاف ورزیوں کے جواب میں رہائی کو ملتوی کر رہا ہے۔
