آزمانک
بازیں وھدے گُوستگ اَت من وتی ناکو زتک ھمدان جان نہ دیستگ اَت من ھروھد ءَ چہ کراچی ءَ آتک آں مکران ءَ بلے آ لوگ ءَ نہ اَت من وھدے لوگے مردم جُست کُت اَنت گُشت اش ھمدان ءِ ھال ءَ تو سرپد ءِ کہ ھمدان چہ کسانی ءَ بلوچ ءُ بلوچستان ئِے دوست بوتگ ءُ ھمدان دُژمن ءِ دیم ءَ سر جھل کنگ وش نہ بوتگ۔۔۔
یک روچے مئے لوگ ءَ لشکر آتک ءُ ھمدان اش جُست کُت بلے اِے وھدی ھمدان تئی تُرو گنجان ءِ لوگ ءَ اَت ھمدان ءِ مات ءَ گُشت پد ءَ کہ لشکر شُت من شُت آں گنجان ءِ لوگ ءَ ھمدان ءَ گُشت کہ تو نوں برو کوہ ءَ کہ اِد ءَ تئی واست ءَ نِندگ شر نہ اِنت گُڑا ھمدان جان ھما اِنت کہ تئی شھیدیں ناکو ءِ گور ءَ شُت برے برے آتک مئے چارگ ءَ بلے ھما اِنت کہ تئی ناکو شھید بوت ھمدان یکبرے لوگ ءَ آتکگ یک ساھتے ءِ واست ءَ ءُ پد ءَ شُت .. من ءَ ھمدان ءِ واست ءَ سک زھیر کنگ ءَ اَت من دہ روچ ءَ نِشت آں بلے ھمدان ءِ پون ھم نیاتک من پد ءَ آتک آں کراچی ءَ بلے ھمدان ءِ یاگی بوھگ ءَ من پھر بست ءُ منی گوانکو ءَ نوکیں نمبرے ءَ چہ رِنگ پیداک اَت .. !!
من چِست کُت۔۔۔
ھلو ۔۔۔۔۔۔۔۔۔۔
ھلو بانُک جوڑ ئے؟
من وشاں۔۔۔۔
تو کے ئے۔۔؟
پاگل من ءَ پجا نیار ئے۔۔؟
بلے بلے۔۔۔۔۔۔
ھال کن تو وش ئے؟
من وشاں رھم اِنت پروردگار ءِ۔۔۔۔
چوناھی ءَ ھمدان ءَ من ءَ کسانی ءَ پہ دوستی ءَ پاگل گُشتگ من پمیشکا پجاہ آؤرت پرچاکہ دگہ کس من ءَ پاگل نہ گُش اِیت۔۔۔۔۔
تو آتکگ ئے مکران ءَ بلے پھل کن کہ من دور بوتگ آں ءُ دامگ ءَ ھم نہ بوتگ آں من انوں لوگ ءَ پون کُت مات ءَ من ءَ ھال دات۔۔۔۔۔
ھاں بلے گُڑا کدی دسھورک بہ ئے من ءَ سک زھیر کنت من کایاں تئی چارگ ءَ۔۔۔۔
زانت نہ کن آں بلے ھر وھدے کہ پارگ باں ترا الم ھال دیاں ھمدان ءَ گُشت۔۔۔۔۔
پد ءَ وھد گوزاں بوت من گوں وتی وانگ ءُ اِے دگہ کاراں دلگوش اِتاں گرماگ ءِ چھٹی بوت اَنت من پد ءَ شُت آں مکران ءَ ھمدان ءِ نمبر جت بلے بند اَت لوگ ءَ ھم ھال نہ کُتگ اَت من پدا پریشان اِتاں اِے بری باریں گِندان ئِے یا ناں ۔۔۔۔۔
دو روچ گُوست ھمساھگاں چہ دو کسانیں جِنک آتک مئے لوگ ءَ من ءَ جوڑی اِش کُت پدا ھمدان ءِ گُھارے کِر ءَ گُشت اِش سدگنج ءَ زور ءُ بیا انوں مئے لوگ ءَ ھُدا زانت کہ منی دل پہ روگ ءَ پِر نہ اَت من بس ھمدان ءِ ودار ءَ کنگ ءَ اِتاں بلے ھمدان ءِ گُھار پاتُل ءَ من ءَ گُشت بِریں چُش شر نہ اِنت پدءَ اِے مردُم ھمدان ءَ گوں سک نزیک انت ءُ ھال ءُ اھوال ھم کن انت ءُ سکیں شریں مردُم اَنت گُڑا من شُت آں گوں۔۔۔۔
آئی ءَ مارا بُرت یک بانے ءِ توک ءَ دو بان یکجاہ بستگ اَت دوھیں بانانی توک ءَ ھم تھتگے پِر اَت مارا چاہ ءُ آپ اش کُت پد ءَ گُشت اش تو ءُ پاتُل برو اِت آ بان ءَ شُمارا مردُمے لوٹگ ءَ اِنت من گُشت یا اللہ۔۔۔۔۔
ھیر اِے نوں کہ بوت کہ مارا لوٹگ ءَ اِنت زاناں وت آتک نہ کنت۔۔۔؟
من گُشت۔۔۔۔
بلے پاتُل ءَ گُشت بِریں باریں پاتُل ءَ لوگ ءِ توکی دروازگ پچ کُت ما دومی بان ءَ شُت اِیں دیست داں ھمدان گوں وتی یک ہمراھے ءَ نِشتگ اَت من سلامے دات آیاں الیک کُت ھمدان پاد آتک دست مِلارینت اش جوڑی اش کُت دومی ھمراہ ھم جوڑی کُت..
من گُشت تو۔۔۔؟
تو چی گُشتگ کے اِنت ۔۔۔؟
کند اِت ئِے ءُ گُشت ئِے اے اولی رند اِنت کہ من ترا سرمچارے ءِ رنگ ءَ گِندگ ءَ آں۔۔۔۔
سی تیری یے ھمدان ءِ کش ءَ اِیر اَت بلے چادرے پِر اَت ئِے۔۔۔۔
من گُشت ماشا اللہ تو نوں مزن بوتگ ئے آ وھدی من ترا دیستگ تو سک کسان ات ئے لوگ ءَ شیتانی کُتگ ترا یات بیت تو مارا ڈرامہ ءِ چارگ ءَ نیشت تو گُشت من کِرکٹ لیب چاراں۔۔۔۔۔۔!!!!
کند اِت ءُ گُشت ئِے پاگل آ کسانی ءِ گپاں نوں مکن آ بری من کسان بوتگ آں من گُشتگ دُرستانی کماش من آں۔۔۔..
من درائینت تو انگت کماش ئے۔۔۔۔
ھاھاھاھا۔۔۔۔
ھمدان ءَ جست کت ءُ گوشت ئِے۔۔۔
ھیر بِل اِے گپاں تئی وانگ چون اِنت۔؟
وانگ جوان اِنت شر گوزگ ءَ انت من ایم اے اولی سالے چکاس ءَ اول نمبر گیپت ءُ پاس بوت آں۔۔۔
ماشااللہ مبارک بہ بیت…
ھیر مراداں بات ئے۔۔۔
من گُشت تو ھال کن چون اِنت شُمئے جُھد ۔؟جنگ چون اِنت۔۔۔؟
مئے جُھد پہ بلوچ ءَ جُنزان اِنت شریں رنگے ءَ گوں دیم ءَ روگ ءَ اِنت جنگ ھم شریں وڈے ءَ بوھگ ءَ اِنت دیمروی کنگ ءَ اِنت آزاتی چماں اندر اِنت اِے جنگ ءَ ما باج بُرتگ سوب مئیگ اِنت ءُ دُژمن ءَ پروش وارتگ بس مارا وتار ءَ ھمے وڑ ءَ دارگی اِنت مئے ایمان سلامت انت۔ اِے جنگ ءَ من پہ وت ابادتے سرپد باں منی پرز ھمیش اِنت من اِے جنگ ءَ دیم ءَ بہ بِر آں من نہ بلکیں اِد ءَ شُمارا ھم لوٹ اِیت اِے جنگ بھر بہ بِت اِے جنگ ءَ وتی بکن اِت وتی راج ءَ سرپدی بہ دے اِت راج ءَ بہ وانین اِت شُمئے وانِندھیں مردُم اِت اگاں شُمے وانگ راج ءِ کاراں مئیت گُڑا شُمئے وانگ ءَ ھچ پائدگ نیست شُمارا چہ ھما شوانگ ھزار سر گِھتر اِنت کہ مارا کوہ ءُ جنگل ءَ گِند اِیت ءُ مئے رازاں دار اِیت ..
ھمدان ءِ اِے گپانی اِشکنگ ءَ گُشیگہ من ءَ یک بلاھیں دُنیایے ءَ بُرت۔۔۔
ماشااللہ اِے ھما ھمدان اِنت اِیشی ءِ دیم ءَ ہرچی گُوشتگ اِشی ءَ ھچ مان نیاؤرتگ ھمدان ءَ نزانتگ جنگ چی یے۔۔؟
بلوچستان کئی سرزمین انت ما کئی گُلام اِیں ۔۔؟مارا کے ءَ بزگ کُتگ مرچی پہ بلوچستان ءِ واست ءَ تُپنگ بڈّ ءَ ئِے اِنت ۔۔۔
گپ ءَ چُش زبر اِنت من ھمے بابت ءَ جیڑگ ءَ اِت آں۔۔۔من نزانت مرچیگیں روچ چون شُت مگرب بوت ھمدان ءَ پاتُل ءَ گُشت برو اِت لوگ ءَ شام ءَ پِر کن اِت مات ءِ زیاں چاراں پدا درکایاں رواں کہ شپ ءِ درآیگ وش تر اِنت من ءُ پاتُل شُت ایں بلے ھمدان ءَ پاتُل گُشت لوگے ڈن ءِ لیٹ ءَ مہ کُش چُش پیش ءِ وڈا کسے چم مہ کپ اَنت پاتُل ءَ بچکند اِت گُشت بےپکر بوں لالا جان ما شام شر کُت دیر نہ گُوست کشیگہ دروازگ ءَ چہ آ پُترت اَنت لوگ ءَ مات ءِ دست گپت اَنت ءُ جوڈی اش کُت کمو نِشت شام اِش کُت درآتک اَنت۔۔۔
ما نِشتگ اِتاں لھتے گاڑی آتک ءُ لوگانی دیم ءَ ھوشتات اَنت گُونڈویے آتک کہ پوج اِنت ھمدان ءِ مات ءَ گوشت شور مکن اِت زاناں دلاراں منی ھمدان جان دیستگ لشکر اش ھال داتگ یکپارگی لوگ ءَ پُترت اَنت مارا جت اِش لٹ ءُ کُٹ اِش کُت لوگانی ساز ءُ سامان پُرشت پروش ءِ آماچ کُت اَنت ھمدان ئِے جُست اِش کُت ما گُشت اِد ءَ نہ اِنت کرنل ءَ گُشت چون اِد ءَ نہ اِنت کمو پیسرتر ھمد ءَ بوتگ گُڑا ھمدان ء مات آتک کرنل ءِ دیم ءَ اوشتات گُشت ئِے ھو ھمدا بوتگ انوں من شام داتگ پدا شُتگ ہرچی کنگی اِنت ترا بکن کرنل ءِ دیم ءَ مات ءَ وتی مُباھل کش اِت ءُ ھمدان ءِ سرا پون ئِے کُت ابا پوجی آتکگ اَنت مئے لوگ ءَ اَنت پون اسپیکر ءَ اَت ہمدان ءَ کند اِت ءُ گُشت پوجیاں ءَ بگُش اِت شُما لیٹ اِت نوں مات ءَ گُشت ھمدان جان تو پریشان مہ بو من مرچی کرنل سک ھبر داتگ بےچارگ ھشک اِنت منی دیم ءَ اوشتاتگ نزانت نوں چے بکنت ۔۔۔۔
ھمدان ءَ گُشت شر کُتگ اما جان شر اِنت اما جان پد ءَ ھال کن آں من کمو دست گَٹ آں پوجی شُت انت انچُش کہ بازار ءِ کراس ءَ سرکپت اَنت مزنیں دگ اِش گپت تیراں توار کُت داں دیراں جنگ بوت تیر ءُ ٹوپانی توار بند وھدے بند بوت منی گوانکو ءَ میسجے آتک کہ لشکرے سر ءَ جوانیں اُرشے بیتگ یک کرنلے گوں ھپت پوجی ءَ مُرتگ ءُ پوج وت مَنگ ءَ اِنت من زانت اِے منی پُلیں ناکو زتک ھمدان ءُ ھمدان ءِ ھمراہ ءَ جتگ انت۔۔من روچ ءِ مرچی پہ وتی ناکو زتک ءَ پھر بنداں من وش بھتے آں کہ یک سرمچارے ءِ من ناکو زتک آں ھما سرمچار ءِ کہ مُدام کوہ ءَ یاگی اِنت۔۔۔
