راجی آجوئی ءِ سپر ءِ بِندات چہ ھما راج ءِ جِند ءِ اندر ءَ بُنگیج بیت، چی ءَ کہ آ مار اِیت منی راج وتی جِند ءِ ڈگار ءِ سر ءَ باروٹیانی دست ءَ زیر زِند ءُ گُلام اِنت۔۔۔۔۔۔گُڑا آ پہ وتی راجی آکبت ءَ آزاتی ءِ دَگ ءَ گچین کنت ءُ رھادگ بیت ۔
ھمے سپر ءُ مِنزل ءِ راھیاں چِہ یکّے بلوچ نیشنل موومنٹ ءِ گْوستگیں بُنجاہی کمیٹّی ءِ باسک واجہ ڈاکٹر دین جان اِنت کہ مرچی دہ سالے توام بوتگ آ ماں دُژمِنیں اِستان ءِ زِندان ءُ تھاریں کُوٹیاں بندیگ اِنت کَے بِہ زانت زِندگ یا۔۔۔۔۔۔۔۔۔۔
بلے اے ھبر بژن نہ بیت! چی ءَ کہ ھکّ ءُ راستی ءِ پیامبر کدی بیگْواہ ءُ شھید کنگ ءَ پد ءَ اندیم نہ بَہ اَنت ، بلکیں آئی ءِ پگرانی چمّگ گیش پینژار بند اِیت ءُ جُوہ رند اِیت ۔ پگر ء آجوئی ءِ آگُنڈاں مین اِیت ءُ چو کُلمیر ءَ میزّرین اِیت ۔
مرچی اے ھبر ءِ منّانک واجہ دین جان ءِ جِند اِنت کہ آئرا دہ سال اِنت تارونکیں شپ ءُ روچ ءِ پدیانکاں ریز ءُ سانکلاں بستگ بلے آئی ءِ کاروان پہ مِنزل ءِ جُنزگ ءَ مھتل نہ اِنت ۔ پمیشکا اے ھبر ءَ دُگنیا ءِ ھر زُوراک ءُ سامراج زانت کہ لیکوی رھشُون ءُ باسکانی پْروش دَیَگ اِنچو ارزان نہ اِنت۔ زُوراک پد ءَ ھم پہ وتی ھاکمی ءُ زُورشاھی ءِ پھازگ ءَ سِٹّ ءُ کپ کنت داں آجوئی ءِ جُھد ءَ نِزوُر ءُ کُنٹ گام بِہ کناں کہ اے وابے مُدام نیم بُندگی ءِ ارجان اِنت ۔
آئی ءِ کسانسالیں جِنکّ مِھلب ھمے دگانی سر ءَ پہ وتی پِت ءِ شوھاز ءَ مزن بیت بلے دُژمِن ءَ را اے سِکت نہ بیت کہ گوں راستی ءَ بِہ گْوشاں تئی پِت منی زِندان ءِ تھاریں کُوٹیاں بندیگ اِنت ، نیکہ راجانی ھمسنتی ءِ بُنجل اکوام متھدہ ءُ دُگنیا ءِ انسان دوستیں گلاں مھلب ءُ سمّی ءِ توار گوشداشتگ ءُ وتی انسانی ھکّ پیلو کُتگ ۔
مرچی ھم مِھلب گوں سمّی ءَ ودار ءِ رھسراں نشتگ ءُ وتی کماش ءِ وداریگ اِنت ، ھمے داب ءَ دِگہ ھزاراں بلوچ پُسّگ پہ وتی بیگْواھیں برات ءُ زھگانی ھاتر ءَ چارراہ ءِ پانگ اَنت ھچ پہ ھچ ۔ بلکیں روچ پہ روچ دِگہ آوار جنت ءُ بارت بلے چہ ھزاراں گیش بندیگاں یکّے پہ آجو بُوَگ گِندگ نہ بیت ، چی ءَ کہ تئی ھمراھی ءَ تئی ڈیھ ایردست ءُ گُلام اِنت ۔ وھدے تئی ڈیھ آجو مہ بیت گُڑا پہ ترا اے روچانی اِیرھت کدی نہ بیت
چرے گپ ءَ پد ھمے ھیال سر کشّ اِیت کہ ھر راج ءُ کَوم ءَ وتی راجدپتر وت ءَ رجگ ءُ نویسگی اِنت ، پمیشکا اے راستی وت ءَ مانا کنت کہ راجدپتر راجاں گوں وتی داتگیں کُربانی ءُ دیم ھُونیاں نبشتہ کُتگ ۔
مرچی تو اگاں الجزائر ، نیدرلینڈ ، ویتنام ، کیوبا ، بنگلہ دیش ءِ راجدپتر ءُ گْوستانک ءَ وان ئے گُڑا ترا اے گْواچن چو روچ ءِ برانزاں گِندگ کَیت کہ آزاتی ءِ جنگ ءَ آیانی چینچو پُسّگ زِندانی ءُ چینچو ماں پاھُو ءِ دْرنگ ءَ گْوازینگ بوتگ ، چینچُک ءِ بالاد گوں کاٹار ءُ شِلّ سریں تیراں دُوچگ بوتگ ۔بلے! چرے کُربانیانی دَیَگ ءَ پد نُوں آیاں وتی زیر زِندیں پوشاک لگوشتگ ءُ آجوئی ءِ چِراگ بالینتگ کہ مرچی پہ شات ءُ ایمنی وتی ڈیھ ءِ لد ءُ کھچر ، ، گْواش ءُ آپبنداں سارتیں گینسارتے کش اَنت۔
پمیشکا مرچی دُژمِن بلوچ پُسّگاں شھید کنت ، آوار جنت ءُ زِندانی کنت دانکہ آزاتی ءِ زرمبش اِیرموش بِہ بیت ، بلے اے ھبر ءَ دُژمِن بِہ زانت کہ اے کُلیں جکانسری ءُ دیم ھُونیانی منّ ءُ مول ، مکسد پہ آزاتی ءَ ۔
اے بابت ءَ افریقی کہاوت ئِے ” جب گھر جل رہا ہو تو ڈھول بجانے سے کوئی فائدہ نہیں ہوتا ” بزاں سامراج ءِ ھِلاپ ءَ تھنا پہ آس ریچیں دانکانی ریچگ ءُ درشان ءَ زیر دستیں زِند آزات نہ بیت ، بلکیں سامراج ءِ ھِلاپ ءَ سِلاہ چِست کنگ ءُ ترا جنگ ءُ جُھد کنگی اِنت ۔
افریقہ ءِ زیر دستیں مھلوک وتی جنگ ءِ دَور ءُ نوبت ءَ ھمے گْوش اِیت کہ ما جنگ پَہ ھمے ھاتر ءَ کنگ ءَ اِیں دانکہ افریقی وتن ءِ سرجم ءُ تانسریں سرزمیں ءِ سر ءَ درمُلکی کْوزہ گیر ءِ ھُکمرانی ءُ زُورشاھی ھتم ءُ ھلاس نہ بیت ما ھمے کار ءَ برجاہ دار اِیں ۔۔۔۔۔۔بزاں جنگ ءَ ۔
چہ افریقی راج ءِ اے گپّاں مارا ھمے دَروَنت رس اِیت کہ داں ما وتی ڈیھ آجو نہ کُتگ گُڑا اے شھید کنگ ءُ ویرانگاں زانگولیں لاشانی چگل دَیَگ ، چہ سالاں بیگْواھی ءِ اے دْرچ اِیرھت نہ بیت ۔ اے روچ ھما روچ ءَ گُٹگِیر بیت کہ گُلامی ءِ شپ لیٹّیت ءُ آجوئی ءِ بام دنت ۔
اے درگت ءَ پہ بلوچ راجی آجوئی ءِ جُنز ءَ گوں یکمُشت ءُ تِپاکی ءَ جُھد ءُ شاھگانیں محاذ ءُ مُھکمیں پلیٹ فارمے ءِ پکار ءُ ھژدری اِنت کہ آئی اندر ءَ راجی لوٹ ءُ گزرانی رِد ءَ سیاسی تاکتے ساڑی بِہ بیت ۔پہ گْواچن ءُ پاک ءُ پلگاریں آزاتی ءَ مُھکمیں پیش بندی ءُ اَمَلی گامگیج چِست کنگی اِنت ۔ اے ڈُبّہ بلوچ لیڈرشپ ءِ کوپگاں۔۔۔۔۔۔۔۔۔۔۔۔۔۔۔اگاں اے نیمگ ءَ چار ءُ دِلگُوش ، ھیال پہ راجدوستی گْور کنگ بوت
گُڑا پہ سِدک اے تھاریں شپ کدی نہ مان اِیت ، نے کسے سالاں ماں کیزھانہ ءَ بیگْواہ بیت ۔۔۔۔۔۔۔۔۔۔
رمس: 26 جون 2019
