ایمنی ( رملچّہ) | میجر مجید

0
347

تلوساں پہ ایمنی
من نہ دیستگ ایمنی
نَے کہ راج ءَ تنگویں
نَے کہ سَولیں پُسّگاں
نَے کہ پیرزال ءُ بے وساں
نَے کہ گوسپند
دْرچک ءُ دار
ڈیھ ءِ ھمُک مئے ساھدار
چہ زُلم ءُ زور ءُ ھَیبتاں
کودک ءُ شیرمچیں زھگ چیول اَنت
ماں گْوانزگاں
چہ ما پُل اِت سبر ءُ کرار
کِیکّ ءُ آہ ءُ زاری اِنت
مئے میتگاں
مئے ھلکواں
مئے مانشاں
مئے پرس ءِ پتّراں
تُپنگ ءُ ٹوپ ءُ تیر ءُ گْوار
کَید ءُ بند ءُ سِنگسار
مھرانی سرڈگار
دودانی پاسدار
سبز ءُ میزریں دیار
سرانی لَیب ءُ گْوازی اِنت
کَے کاپر اِنت کَے نمازی اِنت
سیہ شپ اِنت ھر گْور ءَ
نہ گنداں بام ءُ بامسار
امبازاں مرگ ءَ ھزار بَر
مرگ منی نوکیں زند ءِ
لوٹ ءُ واھگ اِنت
چِست بنت ھون ءِ چَول چہ زر ءَ
پوش اَنت زمین ءَ
ھر گْور ءَ
میناں گوں ھوناں گْواش ءُ کوچگاں
اوگار اَنت ڈُنگ ءِ لشکر ءَ
نامُرادیں سِلگَتاں
ربّالکار ءُ زرھریدیں نَوکراں
دژمن دزبوج ءُ راج ءِ جاپراں
سرانی یک بھارے کَیت
ھما منی ایمنی ءِ مانزمان
ھما منی راجی زند ءِ
پْراھیں آزمان
ھما منی چیدگ ءُ نشان
من نہ باں پدریچ بیت
من نہ باں پدریچ بیت

LEAVE A REPLY

Please enter your comment!
Please enter your name here