سیمی بَھر
چہ بود کنگ ءَ پد من ءَ سما نہ کپت کہ من وابے دیستگ یا پہ راستی من گوں وتی بے وسی ءَ جنگ ءَ بوتگ آں ،
وھدے منی چم پہ دروازگ ءَ کپت اَنت ،چاراں کش ءَ کُرشی ءِ سر ءَ ھما واجکار نِندوک اِنت۔۔۔۔۔منی بے وسی ءِ سر ءَ پہ تژن بچکندگ ءَ اِنت ۔
گوں واجکار ءِ گِندگ ءَ منی باتِن ءَ لھڑیں پاھارے چِست بوت ، بلے پہ زُبان ءَ سر نہ اَت کہ واجکار ءَ دِرّائینت
ھاں ورنا۔۔۔۔۔۔۔۔۔۔!
منّ یے یا نہ منّ ئے۔۔۔۔۔۔۔۔۔۔۔۔۔؟
من کمے بے توار بوت آں ءُ ھِچّ نہ گْوشت ، چاراں واجکار پد ءَ برانز گِپت ءُ گْوشگ ءَ لگّ اِت ۔ ترا پہ گُنگ بُوَگ ءَ کس نہ بکش اِیت ، انگت گھتر اِنت کہ وتی ڈوہ ( جُرم ) ءَ بِہ منّ ءُ چاریں روچانی زِندگی ءَ مرگ ءِ چنکّاں چگل مہ دئے۔۔۔۔۔۔۔۔۔۔
تئی پیمیں ھزار ما کلّ ءُ جِناورانی وردن جوڑ کُتگ ، تئی بسات چے۔۔۔۔۔۔۔۔
( من دِل ءِ تہ ءَ گْوشت۔۔۔۔۔۔۔۔، اے ھبر من ھما روچی پھم اِتگ اَت۔۔۔۔۔۔۔۔۔۔کہ من یک گُلامے آں ، گُلام ءِ چے بِستار ۔ )
گوں واجکار ءِ گپّانی ھلاسی ءَ پد منی جُستانی ھما یکّیں پسّو اَت ، دِگہ ھبر ءِ گْوشگ ءَ گْوش ئے منی زُبان لِلّ اَت۔۔۔۔۔۔۔۔
من گْوشت سر۔۔۔۔۔۔۔۔۔۔!
وتی ھُدا ءُ پاکیں پیگمبر ءَ بِہ چار اِت ۔ من کہ ڈُوھکار نہ آں ، وَ سر ءَ چتور دِگہ گْرانیں بارے کُوپگاں زُرت کن آں۔۔۔۔۔۔۔۔۔۔۔۔
واجکار ءَ پہ نادلکشی پد ءَ گْوشت ،
بِہ چار ورنا۔۔۔۔۔۔۔۔۔۔۔۔!
مارا مجبُور مہ کن کہ ما تئی کارچیں زُبان ءَ مِگراز بِہ کن اِیں ، اگاں تو وتی ءُ وتی مات ءُ گْوھار ءِ زِندگی ءَ پہ پِنڈگ لوٹ ئے۔۔۔۔گُڑا زُبان ءِ واگ ءَ لگوش ءُ راستی ءَ مئے دیم ءَ سھرا کن۔۔۔۔۔۔۔۔۔۔۔۔۔۔، اگاں نا ترا وشھالیں زِندمان پکار نہ اِنت گُڑا وتی دِلیگ ءَ بِہ کن ءُ ما ھم وتی۔۔۔۔۔۔۔۔۔۔
چہ واجکار ءِ اے پادتراپ ءُ بیھار چکاریں جواب ءَ منی دیدگانی ارس ٹُپّ ٹُپّ ءَ چہ گْورجیگ ءِ آپریچ ءَ جھلاد اِت اِنت کہ واجکار ءَ پد ءَ چو مستیں لیڑہ ءَ درِیشّاپ کُت ،
ما ھما آپ داتگیں آسِنّیں پہ تئی دو تْرمپ ارس ءِ ریچگ ءَ موم نہ بَہ اِیں۔۔۔۔۔۔۔۔، بلکیں اے ارساں گوں وشّی ءَ ھم بدل کن اِیں ، ءُ موتک ءَ ھم ،
چے کہ ترا دوست بیت۔۔۔۔۔۔۔۔۔
من زانت اے کھر وار چے کہ بِہ لوٹ اَنت ھمائی کن اَنت ، بلے بے وسیں زِرد راستی ءِ پدیانک ءِ سر ءَ میھ ءَ میھ میلانک اَت کہ من راستاں۔۔۔۔۔۔۔۔۔۔۔۔، وت ءَ پرچا میاربار بِہ لِیکّ آں۔۔۔۔۔۔۔۔۔۔
دومی نیمگ ءَ واجکار ھم وتی گْوشتگیں گپّ ءِ سر ءَ چو مِتگیں دار ءَ اُوشتوک اَت ، پمیشکا اے گْرانیں ساھت پمّن چہ سِرات ءِ مُستکیم ءَ گْران تِرّیں چکّاسے اَت ۔ من ھمے دو دِلگی ءِ تہ ءَ واجکار ءِ پسّو چرّینیت ءُ گْوشت ،
سر۔۔۔۔۔۔۔۔۔۔۔!
منی ھبر ھما یکّیں ھبر اِنت ، من دِگہ دُروگ بست نہ کن آں ۔ کُش اِت شر۔۔۔۔۔۔۔۔زِندگ کن اِت شر۔۔۔۔۔۔۔۔۔۔۔کارچ ءُ گوشت شُمئے دست ءَ اِنت۔۔۔۔۔۔۔۔۔۔۔۔، ھرچی شُمارا واجہ ھُدا پرما اِیت۔۔۔۔۔۔۔۔۔۔۔
منی گوں اے ھبراں چاراں واجکار تْرندی ءَ زھر گِپت ءُ گْوشگ ءَ لگّ اِت ، ترا کہ پہ راستی ءِ درشان کنگ ءَ گْوشگ بیت تو مُدام مارا ھُدا ءِ بیھار ءَ دے۔۔۔۔۔۔۔۔۔۔
ما وتی ھُدا وت اِیں ، مارا ھُدا ءِ بیھار ءَ مہ دے کہ ھرچی شُمارا ھُدا پرما اِیت۔۔۔۔۔۔۔۔۔۔، بلکیں ما ھمائی کن اِیں کہ مارا مئے دِل۔۔۔۔۔۔۔۔۔۔۔۔۔۔
گوں اے دوئیں دانکاں پد وتی ھمراہ ئِے توار جت اَنت ، چہ توار جَنَگ ءَ پد کترھے نہ گْوست کہ آئی ءِ رستریں ھمراہ اتک ءُ سر بوت اَنت۔۔۔۔۔۔۔۔۔۔۔
سر بُوَگ ءَ ھوار واجکار ءَ گوں ھمراھاں درّائینت ، اِیشی ءَ بَر اِت اِیشگی مات ءُ گْوھار ءِ کِرّ ءَ گُڑا راستی ءَ وت منّ اِیت کہ من ڈُوھکاراں یا نہ ۔
رستراں من ءَ جَن ءُ چانپُڑ ءَ پد گِرّان کنان کُت ءُ دِگہ کُوٹی یے ءَ بُرت ۔
ساھتے ءَ پد چمّانی سْیاھیں پُچ لگوشگ بوت چاراں منی دیم ءَ یک بْرھنگیں جنین آدم ءُ کسانیں جِنکّے ءِ چمّ ، دست ءُ دپ بندوک اَنت ءُ شکون دیم کپتگ اَنت ۔ منی دِل ءَ دْریکگے جت بِہ گِندئے منی مات ءُ گْوھار بِہ بَہ اَنت۔۔۔۔۔، گُڑا من ءَ ھَستگانی ءَ یلہ دات ءُ من چہ ھوش ءُ سار ءِ گیابان ءَ دُور رپت آں۔۔۔۔۔۔۔۔۔۔۔۔۔۔
باریں چُنت کلاک ءُ ادار ءَ پد بود کُت ءُ جان چہ آپ ءَ میچل اَت ، بلے جنین آدم ءُ کسانیں جِنکّو انگت منی دیم ءَ پہ بْرھنگی شکون دیم اِت اَنت۔۔۔۔۔۔۔۔۔۔۔
چاراں پُشتی نیمگ ءَ واجکار ءَ شاکار اِت ءُ گْوشگ ءَ لگّ اِت۔۔۔۔۔۔، اگاں تو اِیشاں پجّا آرگ ءَ نہ ئے گُڑا یکّے تئی مات ءُ دومی گْوھار اِنت۔۔۔۔۔۔۔۔۔۔۔۔
گھ ھمیش اِنت راستی ءَ بِہ منّ کہ من ڈُوھکاراں ، اگاں نا پیسریگیناں بِل۔۔۔۔۔۔۔۔۔۔!
انوں تئی چمّانی دیم ءَ گوں اِیشاں وتی دوزھیں ھوسّ ءِ آس ءَ تُوس اِیں۔۔۔۔۔۔۔۔۔۔۔۔۔۔۔۔۔۔
وھدے واجکار ءِ جَوریں دپ ءَ اے کَلکُوتیں ھبر درکپت ، تہ یکرندے پد ءَ منی جھلی جھل ءُ بالی ۔۔۔۔۔بالاں شُت۔۔۔۔۔۔۔۔۔۔۔۔۔۔
دمانے ءِ بے تواری ءَ پد چہ زِرد ءِ لھڑیں پاھارانی شم ءَ ھمے گپ درکپت ، وائے بے وسی ( وائے گُلامی )۔۔۔۔۔۔۔۔۔! ناٹاپی ترا چم ء پُشت مہ کپات۔۔۔۔۔۔۔۔۔۔۔
مرچی تو وتی سْیاہ ءُ پُوچّیں کارِستانی گْرنچ پہ راستی بُتک ، بلے ریزاں بستگیں بنی آدم ءِ شرپ ءِ چے بسات۔۔۔۔۔۔۔۔۔۔۔
من پد ءَ پہ بے وسی ھما پسّو ءِ ھُدابُند اِت آں ،
گُڑا کمّیں دِل ڈڈّ کُت ءُ گْوشت،
سر۔۔۔۔۔۔۔۔!
چرئے بدھالیں زِند ءَ شرپداریں مرگ گھتر اِنت ، شُما پہ لٹّ ءُ کُٹّ من ءَ دُروگ بندگ نہ پرما اِت ، منی گُڈّی ءُ آھری پسّو ھمیش اِنت۔۔۔۔۔۔۔
من بے میار آں ، کُشت اِت شر زِندگ کن اِت شر۔۔۔۔۔۔۔۔!
من چِد ءُ گیش بے شرپی سگ اِت نہ کن آں ، نیکہ من ءَ وتی مات ءُ گْوھار چو بے شرپی ءَ شات بَہ اَنت۔۔۔۔
ھمے ساھت ءَ زِرد ءَ بارگیں دردے ءَ سر چِست کُت ءُ وتی درشان چوش کُت
” تو بِہ کن کھر ءُ من ءَ مھر بِہ بیت ، چوش نہ بیت ”
بلے ھبر پہ زُبان ءَ مھتل اَت۔۔۔۔۔۔۔۔۔۔۔
گْوش ئے منی اے ھبر پہ واجکار ءَ ٹالبُرّیں تپر ءُ سوھانیں تیر اِت اَنت کہ آس گِپت ، ھما دمان ءَ من ءَ گوں بُوٹاں مان بست ءُ وتی ھمراہ ءَ را گْوشت ئِے۔۔۔۔۔
بُرو بلیک لیبل ءُ سارتیں آپے بِیار۔۔۔۔۔۔۔۔من اِیشی ءَ گْوش آں کہ راستی چی یے۔۔۔۔۔۔۔۔۔۔
چی ءَ کہ لٹّ ءُ کُٹّاں ابید ، برپیں زِمستان ءِ سارتی ءُ کُورُمیں گرماگ ءِ جلّ ءُ جولاں ھم من ءَ وتی ونڈ داتگ اَت ، بلے واجکار ءِ نوکیں بیھار کہ تئی چمّانی دیم ءَ گوں تئی مات ءُ گْوھار ءَ بے شرپی کن آں ، اے ھبر منی جان ءِ ھر بند ءَ چو گوالگ دوچی سُوچِن ءَ دُوچان ءُ ارواہ ءِ ھیسکارگاں اِیر کپان ءُ بُوجان اَت۔۔۔۔۔۔۔۔۔۔۔۔۔۔۔۔۔
ھمے ھبر ءِ پُژدر ءَ من کمّیں گوں وت ءَ سوڑگ کُت کہ بِہ منّ ، اگاں نہ منّ اِت گُڑا گیش رُزواہ بَہ ئے ، تئی چمّانی دیم ءَ تئی مات ءُ گْوھار ءِ ننگ ءَ گوں چو لیبو ءَ لیب کنگ بیت۔۔۔۔۔۔۔۔۔۔۔۔۔۔
کسانیں دمانے یے بے تواری ءَ پد دِل ءَ آسیں مارِشتانی بُنزہ بُن گِپت ءُ ھمے ھیال دیم ءَ اتک کہ مرچی ءَ پیسر تو سرپدے کہ گوں آیاں چے کنگ بوتگ ؟
بلکیں اے کلپ ءُ سرّاپاں مرچیگ ءَ پیسر ھم اے بدّیں کارپد گوں تئی مات ءُ گْوھار ءَ کُتگ۔۔۔۔۔۔۔۔، گُڑا تو کُجام جَور ءَ ور ئِے کہ آزردگیں زِرد ءِ زیمّاں بِہ تیمّار اِیت۔۔۔۔۔۔۔۔۔۔۔۔۔۔۔
ھمے جیڑگ جیڑگ ءِ تہ ءَ چاراں واجہ ءِ سِپائیگ گوں سارتیں آپ ءُ تْرنداپ ءِ بوتل ءَ سر بوت اَنت ، بلے جنین آدم ءُ کسانیں جِنکّ گوں بْرھنگیں بالاد ءَ منی ءُ واجہ ءَ ھوار واجہ ءِ ھمراھانی دیم ءَ پہ شکون دیمی کپتگ اِت اَنت۔۔۔۔۔۔۔۔۔۔
چہ تْرنداپ نوشی ءَ پد واجکار چو گُروناکییں اپس ءَ چیر کپت گوں کسانیں جِنکّو ءَ ، آئی ءَ وتی وس ءُ واک ءَ اِنگُو آنگو پاد سُرّینتاں۔۔۔۔۔بلے واجکار ءَ لھتیں چپانٹ سر ءُ گُوشاں دات ءُ وتی مستی ءِ جھلاد کنگ ءَ گُلائیش بوت ۔
اے نِدارگ پمّن سک تورناک اَت ، بلے دست ھِچّ ءَ نہ رست ءُ وت ءَ وت ملامت کُت کہ چرئے زِند ءَ مرگ گھتر اِنت۔۔۔۔۔۔۔۔
چوش کہ مرگ ھم نزّیک ءَ پہ گِدارے گِندگ نہ بوت کہ مردُم وت ءَ آئی ءِ کُٹّ ءَ چَگل بِہ دنت ءُ وتی تماشا ءَ وت بِہ چار اِیت۔۔۔۔۔۔۔۔۔۔۔
ھمے دمان ءَ چاراں واجکار ءَ پد ءَ درّائینت ،
ھاں ورنا۔۔۔۔۔۔۔۔۔۔۔۔۔!
انگت ترا اگاں گپّے گْوشگی اِنت گُڑا بِہ گْوش کہ تئی مات رکّ اِیت ، اگاں نا تئی مات ءَ گوں ھمائی کن آں کہ تئی گْوھار ءَ گوں چے بوتگ۔۔۔۔۔۔۔۔۔۔۔۔۔
من دلجم اِت آں کہ اے ناشریں مُردار چے بِہ لوٹ اِیت ھمائی کنت ، بلے منی کِرّ ءَ گپ ءِ جِند کہ نیست۔۔۔۔۔۔۔چے بِہ گْوش آں۔۔۔۔۔۔۔۔۔۔
من پہ ارسیگیں چمّے پسّو دات ءُ گْوشت ،
سر۔۔۔۔۔۔۔۔۔۔!
من ءَ ھِچّ گپ نیست ، شُمارا پہ ھُدائِگی باور نہ بیت منی چے بِستار۔۔۔۔۔۔۔۔۔۔؟؟
ھرچی شُمارا پاکیں ھاوند پرما اِیت۔۔۔۔۔۔۔۔۔۔
برانز گِپت ،
گْوش ئے منی اے ھبر ءَ واجکار چو گونڈل ءُ ٹیسریں تیر ءَ سُپت ۔ من ءَ لھتیں لگت ءُ مُشت ئِے جت ءُ سِپائیگے پرمات کہ گوں پِیرزال ءَ سْیاہ کاری بِہ کنت ، سِپائیگ ھم وداری اَت کہ اے دم نا آ دم واجہ پرمان بِہ کنت ، گوں واجکار ءِ پرمان ءَ ھوار سِپائیگ گوں پِیرزال ءَ دیم سْیاھی کنگ ءَ بُنگیج بوت ۔ آئی ءَ ھم بازیں پاد شانی یے کُت ، بلے زوراک ءِ دیم ءَ پُوپل ءُ سُرپ ھما ساھت ءَ آپ بیت۔۔۔۔۔۔۔
واجکار ءُ سِپائیگ ءِ اے بدّیں کارپد منی جبین ءِ اندر ءَ چو کُورُم ءَ آسے مالان اَت ، پِگّرانی چمّگ بُلبُلُکی جَنَگ ءَ اَت کہ اِے زِند ، زِندے نہ اِنت۔۔۔۔۔۔۔۔۔
ھمے ساھت ءَ واجکار ءَ شاکارگے جت ءُ گْوشت ، ھاں ورنا چے دیست۔۔۔۔۔۔۔۔۔۔۔؟
اگاں تو وتی زُوان ءِ کُبل ءَ مہ پْروش ئے گُڑا گوں ترا ھم ، ھمے کار کنگ بیت ، گھتر ھمیش اِنت شپی بِہ جیڑ ءُ باندا من تئی دْرھبات ءَ کا آں۔۔۔۔۔۔۔۔۔
من ھِچّ نہ گْوشت ءُ پسّو نہ دات ، گُڑا واجکار ءَ را منی ھاموشی ءَ گیش آچ اِت ۔
گْوشی من ترا گْوش آں۔۔۔۔۔۔۔!
تو زان ءَ گُنگ ئے۔۔۔۔۔۔۔۔۔؟
من چہ زھر ءَ تْرکّگی اِت آں بلے ھِچّ نہ گْوشت ، واجکار پد ءَ برانز گِپت ءُ گوں ھمراھاں گْوشگ ءَ لگّّ اِت ، بلے چیر کپ اِت داں نہ تُستگ یل ئِے مہ دے اِت۔۔۔۔۔۔۔۔۔
اِیشاں گِپت منی جَنَگ ءُ چُوپگ بِندات کُت ، ھمے جَنَگ جَنَگ ءِ تہ ءَ من کُوناھگ ءَ اِت آں کہ اِیشاں من ءَ یلہ دات ءُ واجکار ءِ پرمان ءِ پد ءَ ھمے پِیرزال ءُ جِنکّو پہ گِرّان کنان چہ منی کُوٹِیُک ءَ کش اِت اَنت ءُ دِگہ دیمے بُرت اَنت۔۔۔۔۔۔۔۔۔۔۔۔
ھمے کُوناھگ ءِ تہ ءَ واجکار ءَ یک ءُ دو لگت من ءَ کُوپگاں دات ءُ گْوشت ، سُھب ءَ وت ءَ جاڑی کن کہ تئی باریگ اِنت۔ اگاں زُوان ءِ کُبل پْرشت ترا نوکیں زِندے رس اِیت ، اگاں نا ترا ھمے داب ءَ سزا دے اِیں ءُ کُش اِیں۔۔۔۔۔۔۔۔۔
بلے چو پہ ارزانی یلہ نہ بَہ ئے ، دِلجم ببُو۔۔۔۔۔۔۔۔۔۔!
چرئے گپ ءَ پد گوں وتی چوگانز ءُ ٹی ٹی ئیں سِپائیگ ءَ پُشتے ماندات ءُ رپت۔۔۔۔۔۔۔۔۔۔
من ھمے ٹپّ ءُ ٹورانی نالگ نالگ ءِ تہ ءَ چہ سما ءَ درکپت آں ءُ بے سما بوت آں ، وھدے سما ءَ اتک آں چاراں تھاری اِنت ءُ چِرتّانی سُروز ساز اِنت۔۔۔۔۔۔۔۔۔۔۔