یک گپےءِ گیشّینگ ھژدری انت من بہہ اردو زبان ءِ بائیکاٹ ءِ جار نہ جَتگ ـ اردو چہ در کسانی منا گون انت ـ پدا زبان معصوم بنت، زبان تاوان نہ دینت ـ تاوان ھما دینت کہ زبان ءَ وتی سلاہ جوڑ کن انت ـ مئے جنگ گوں ھمایان ایں ـ اردو وَ منی دوستیں سنگتانی زبان انت ـ اے سنگت ھم چوں منی رنگ ءَ بزگ ءُ وار آں ـ ھو، بلے من نوں فیصلہ کتگ وتی گیشتریں نکاناں بلوچی کناں ـ جاھے سک باز ھژدری بیت گڑا اردو ءَ زوراں ـ
منی بازیں سنگتاں دز بندی کتگ کہ من اے جار ءَ پدا بہ زوراں ـ اے سنگتانی تہا بلوچ ءُ دری مردم ھر دو ھواراں ـ آیانی رد ءَ چوش کنگ ءَ من بلوچ ءَ تاوان دیاں ـ من اے درگت ءَ سک باز پگر کتگ ـ منی ھیال ءَ بلوچ ءِ تاوان ءِ گپ تھنا ھیال انت ـ ایشی ءَ ھچ بنیات نیست ـ
بلوچ راجی جیڑہ ءِ بابت ءَ اردو ءَ ھزارانی کچ ءَ نبشتانک نبیسگ بوتگ ـ مئے دراھیں سیاسی گَل اردو ءَ بیان دینت ـ رھشون اردو ءَ گوشتانک دینت ـ مئے نعرہ اردو، پمفلٹ اردو، بینر، چاکنگ دراھیں چیز اردو ءِ تہا آں ـ پدا ھم پاکستانی مارا جست کن انت “آپ بلوچی بھائیوں کا مسئلہ کیا ہے” ـ بزاں مشکل اردو بلوچی نہ ایں ـ مئے ءُ ایشانی نیام ءَ یک ھنچیں دیوال انت کہ آئی ءِ پروشگ چہ مئے وس ءَ در ایں ـ باید اے وت ئی بہ پروش انت ـ ایشانی نپ ءُ سیت گوں پاکستان ءَ ھمگرنچ انت ـ داں ایشانی نپ ءُ سیت گوں ما ھمگرنچ نہ بنت اے مئے ھمراہ داری کت نہ کناں، توری ما مینار پاکستان ءَ جلسہ بہ کنیں ـ گڑا جست ایش انت بے سوبیں امیتانی ھاتر ءَ ما پرچا وتی زبان ءَ دائم لگت مال بہ کنیں؟ ـ
شھید ساجد حسین ءَ دیرے منا سکین داتگ ات کہ من وتی نبشتاری زبان ءَ یا وَ بلوچی بہ کناں یا انگریزی ـ ساجد حسین ءَ رد ءَ انگریزی نبیسگ ءَ ما دری مھلوک ءَ وتی سنگت کت کنیں پرچا کہ آیانی گوں پاکستان ءَ ھچ وڑیں نپ ءُ سیت نیست ـ آ نہ تھنا مئے جیڑہ ءِ سرا ھشکیں باوست نہ کناں بلکیں مارا چیر ترّینگ ءِ کوشست ھم نہ کناں ـ بلوچی ءِ باروا سنگت ءَ گوشت کہ بلوچی ءَ نان فکشن سیاسی لبزانک سک نزور ایں ـ اگاں ما بلوچی ءَ وتی سیاست ءِ زبان بہ کنیں اے پہ بلوچی ءِ دیمروی ءَ مزنیں ھزمتے بیت ءُ مئے رنگیں نبشتہ کار کالونائزر ءِ نبشتہ کارانی ھیال ءُ گالبنداں چے ھم کم کم ءَ آجو بنت ءُ وتی گلزمین ءَ گوں آیانی سیادی مھکم تر بیت ـ من ساجد حسین ءِ گپ نہ زُرت ءُ وتی دلیل داتاں کہ اردو پرچا ھژدری انت ـ
بانک ملک ناز ءِ کوش ءُ دتکیں برمش ءِ ٹپی بوگ ءَ رند من لہم لہم ءَ مار ات سنگت ساجد حسین ءِ گپ راست بوتگ آں ـ ما وتی وھد ءَ زوال کنگ اوں ـ اگاں من اولسر ءَ بلوچی نان فکشن سیاسی لبزانک ءِ نیمگ ءَ دلگوش بہ داتیں نہ تھنا منی جند ءِ بلوچی گھتر بوتگ ات بلکیں منی ھیال، چیدگ، گالبند ءُ پگر کنگ ءِ وڑ ءُ پیم ھم ردوم زیران زیران بدل بوتگ اتاں ـ انوں ھال ایش انت اگاں یک ویلے یے سرا منا شعرے ھم یات کئیت گڑا آ اردو ئیگ ایں ـ اے مارا گیشتر تاوان دیگ ءَ ایں ـ
آ سنگت کہ بلوچی سرپد نباں آیانی مانزمان ما وَ نہ ایں ـ زاناں شاہ لطیف بھٹائی ءَ نشتگ پگر کتگ کہ اگاں ما سندھی بہ کناں ایدگرانی چے بیت؟ ـ مروچی ھر کس ءَ شاہ ءَ گوں ھب انت وت رؤت بھٹائی ءَ شوھاز کنت ـ
لہتیں سنگتانی گوشگ انت بلوچی ءَ سائنس، فلسفہ، گوستانک ءُ دگہ علمی تھر نیست آں، بلوچی ءِ دامن لُک انت ـ اے گپ راست ایں، ھچ شک نیست ـ جست بلے ایش انت بلوچی زبان ءِ دامن ءَ پراہ کنگ ءِ ذمہ وار کئے؟ ـ ڈونلڈ ٹرمپ ءُ پیوٹن بیاینت مئے زبان ءِ دامن ءَ پراہ بہ کن انت؟ الّم در ءَ چے وَ ھچ کس نہ ات ـ ھرچی کنگ ئی ایں مارا کنگی ایں ـ گڑا نیمون آرگ ءَ چے گھتر نہ ایں ما وتی ذمہ واری ءَ بہ مار ایں ءُ وتی زبان ءَ شر تر ءَ چے شر تر کنگ ءِ نیمگ ءَ دلگوش بہ دئیں ـ
بلوچی زبان چہ پیریناں مارا رستگ ـ اے مئے گورا امانت انت ـ ما باید وتی چکاں پہ شری ایشی ءَ سر بہ کنیں ـ اگاں ما اے امانت ءَ مہ پھریز ایں گڑا بزاں ما راجی گناہ کار ایں ـ
بلوچی مئے وتی شھدیں زبان انت
بلوچی سبز بات
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اے نبشتانک ما واجہ ذولفقار علی زلفی ءِ فیس بک تاک ءَ چہ زرتگ ءُ ” سنگر ” ءَ شنگ ایش کنگا ئیں۔ ما سرپد یں کہ بید ءِ واجہ ءِ موکلءَ اے کار ءَ ما پہ قانود کرت نہ کنیں بلئے اے جیڑہ ءَ مارا لاچار کرتگ کہ ما اے نبشتانک ءَ شنگ بکنیں۔ امیت اِنت کہ واجہ زلفی مارا پہل کنت۔ بلے اے انچیں جیڑہ یے کہ ہمک بلوچ ءُ ہمک بلوچ سیاسی گللاناں جیڑگی اِنت ۔ادارہ سنگر