ایران سے آنے والی زائرین کی بس بلوچستان کے مکران کوسٹل ہائی وے پر حادثے کا شکار ہو گئی جس کے نتیجے میں 10 افراد ہلاک اور 30 سے زائد زخمی ہو گئے۔
زائرین کی بس کو حادثہ اورماڑہ کے علاقے میں بزی ٹاپ کے قریب پیش آیا، بریک فیل ہونے کے باعث بس کھائی میں گر گئی۔
ریسکیو ذرائع کے مطابق حادثے میں 10 افراد ہلاک اور 30 سے زائد زخمی ہوئے۔
پولیس کا کہنا ہے کہ ایران سے آنے والی بس زائرین کو لے کر پنجاب جا رہی تھی، زخمیوں اورہلاک افراد کی میتوں کو قریبی اسپتالوں میں منتقل کیاجا رہا ہے۔
پولیس حکام کا کہنا ہے کہ زائرین کا تعلق لاہور اور گوجرانوالہ سے ہے۔
یاد رہے کہ چند روز قبل بھی ایران میں پاکستانی زائرین کی بس کو حادثہ پیش آیا تھا جس میں 28 افراد ہلاک اور 15 زخمی ہو گئےتھے۔