منی بچّیگ سالونک اِنت
گُشئے چو چاردہی نوک اِنت
نہ اِنت تہنا منی سالونک
مروچی راج سالونک اِنت
وطن ماتیں مئے بانور اِنت
مروچی بچّی ءِ سُور اِنت
”بَر اِت اِش کورگاں جان ءِ بہ شود اِت”
بیار اِت میری اَرداچاں بہ بوج اِت
زباد ءُ امبر ءُ مسکاں بہ دْرنز اِت
زبادیں چوٹواں نرمیں بہ رند اِت
بلوچی غیرت ءِ پاگ ءِ بہ بند اِت
سر ءِ مندیل گوں چِلّ بُرّیں سپاہ ءَ
تلاہیں کارچے کوپگ ءِ راستی بہ دْرنج اِت
سلاہ ءُ سنج ءُ دمبال ءَ چَروکیں
سگار زاگ داتگیں ”ہِندی” وروکیں
چہ ڈیھ ءِ دژمناں باج ءَ بَروکیں
‘ہلو ہالو کن اِت راج ءِ جنکاں
ہلو ہالو کن ات سالونک نوابیں
منی سالونک گوں چوتاریں گُدانیں
ھلیریں چادرئِے سرکوپگ ءَ اِنت
یلی بند کتگ دزمال گوں بُکشاں’
مہ گْوار اِت تْرونگلیں ارساں مروچی
جنوزامی گُداں مرچی مہ پوش اِت
غُلامی ریدگیں طوق ءَ لگوش اِت
بہ دار اِت مودگ ءُ موتکاں مروچی
گْوشاں بئت سوت ءُ نازینکاں بلوچی
دو چاپی ڈُہل ءُ سُرنایاں دَمین اِت
زبادیں ہنیّاں دستاں رَزین اِت
جہان ءَ ایر کتگ نکشے شہید ءَ
کُتگ میر کمبر ءِ کبر امبو شہید ءَ
پہل انت حق منی بچّیگ ترا را
سر اِت کُرباں کُتگ ماتیں ڈگار ءَ
سر اِت کُرباں کتگ ماتیں ڈگار ءَ