تاج مھل مھر ءُ دوستی ءِ تاج اِنت
ماھیں ممتاز ءِ کُچّلیں یات اِنت
کرگزاں سَیل ءُ ماھلاں نیاد اِنت
چاریں آتراپاں رُژن تالان اِنت
کَوش گْوش ئے باگیں جنت ءِ گْوات اِنت
ھر چھار وھد ءُ موسم ءَ سارت اِنت
نود شنزان اَنت ،مِسک دْرنزان اَنت
ندارگ دلکش اِنت مھر ءِ ماڑی ءِ
ھِشت گْوش ئے مھر ءِ وزبت ءَ وان اَنت
زیمر دل بُرّیں درد درشان اَنت
تاسے کہ لُڈّ اِیت ماں زِر ءَ سوریں
ترانگ ءُ تَھتال ماھل ءِ جَوریں
چیدگ ءُ آماچ داستان مھر ءِ
دِھلی ءِ شان ءُ آگرہ شھر ءِ
گْواز بہ کنت مَردے مھر ءِ دریا ءَ
لُنجمیں آزمان ءَ بہ جنت تھت ءَ
شاھجان ءُ ممتاز ءَ نہ بارت باج ءَ
باز چشیں آشِک گْوستگ منی راج ءَ
چمّاں اندیم اَنت ءُ دلاں زندگ
سِیمک ءُ نتھا ءِ تھکُشیں ترانگ
اومر ءُ ماھو ءِ کبر نہ بنت زانگ
ماں گِلی ءَ ءُ ادّیرہ ءِ ڈنّ ءَ
بلیدہ ءِ دِلبند ءِ سر ءَ واب اَنت
کیچ ءَ لال بی بی تنگویں سنجر
دین ءِ ارجان ءُ ندر دودانی
داتگ اِش مِھر ءَ ھون ءُ کُربانی
ھانی ءُ شے ءِ مھرکُشیں کسہ
کیّا ءِ مھگونگ سدو ماھیں
باھو داں بیلہ یک شپے راہ اِنت
سسّی ءُ پُنّو میری ءِ براہ اِنت
بمبور ءِ ڈنّ ءَ کبر اِش بیگواہ اِنت
شاھد اِنت میری ءِ کلات مھر ءِ
دپتراں مان اِیت مھر وتی رنگ ءَ
مھر مدام ھست ءُ مھر نہ بیت بیگْواہ
کینگ ءُ کَست ءِ بال کنت ارواہ
مھر ھاوند ءِ پُلّیں سوگات اِنت
مھر بْرات اِنت ءُ مکّھیں مات اِنت
مھر ھجّ اِنت ءُ مھر ارپات اِنت
مھر گُل ءِ اندام ڈیلّ ءُ بالاد اِنت
مھر زمین اِنت ءُ مھر وتن مات اِنت
مھر گْوھارانی لجّ ءِ شوندات اِنت
مھر منی ڈیھ ءِ سُورمگیں ھاک اِنت
مھر منی ڈیھ ءِ سورمگیں ھاک اِنت
***