من گوں وتی نِزوریں زانت ءُ زانگ ءَ مرچی یک انچیں نام ءُ شرپداریں مردمے ءِ بابت ءَ نبشتہ کنگ ءَ آں، چہ آئی ءَ پَھِلی لوٹاں، چی ءَ کہ من اے گپّ ءَ دِلجماں کہ منی کَلم گوں آئی ءِ مزن نامیں کِرد ءَ اِنساپ کُت نہ کنت، بلے دِل ءِ پاھار اَنت کہ پہ وتی راجی رھشُون ءَ درشان اِش کن آں ۔پرچا کہ آ یک انچیں ھستی یے، آئی ءِ سِپت ءُ ستا ستر کنگ بِہ بیت کم اِنت، چی ءَ کہ آ گوں وتی پاک ءُ پلگاریں کِرد ءَ توسیپ ءِ مُھتاج نہ اِنت۔ پمشکا من اے گپّ ءَ پہ سِدک گْوش آں کہ واجہ منّان یک پچیں کِتابے بوتگ، ءُ انگت آئی ءِ جْوانیں کِرد مارا چو پچیں کِتابے ءَ وانگ ءُ دربرگی اِنت۔
مرچی اگاں من گوں وتی نابزانتی ءَ واجہ منّان بلوچ ءَ راھدربر ، اُستاد، ڈاکٹر، رھشُون ، کواس ءُ زانتکار بِہ گْوش آں رد نہ بَہ آں، چی ءَ کہ آئی ءِ کوھیں بالاد اے تیوگیں لبزاں چہ بُرز ترّ ءُ پُرمانا تِر اِنت۔۔۔۔۔۔۔۔
ھمے وڑ ءَ واجہ منّان بلوچ نادْراھیں چاگِرد ءِ دانشمندیں ڈاکٹرے اَت، بلے ڈاکٹر منّان ءَ لھتیں انچیں بیمارانی اِلاج کت کہ بیماراں وتی نادْراھی وت نہ زانتگ اَت، چی ءَ کہ گُلامی ءَ انچو پہ دیم کس نہ پھم اِیت۔
پمشکا من گْوش آں کہ ڈاکٹر منّان بلوچ راجی جُنز ءِ اندر ءَ ھما بے مُلّیں سر اَت کہ آئی وتی زِند ءِ ھر ساھت ءُ دمان پہ بلوچ راج ءِ سرپدی دَیَگ، سر ءُ سوج کنگ ءَ گْوازینت۔ آ مُدام گوں ھمے درس دَیَگ ءَ گُلائیش اَت کہ بلوچ راج گُلامی ءِ نادْراھی ءَ گْورجتگ، اگاں ما گوں ھور ءُ تپاکی ءَ گُلامی ءِ اِلاج ءَ در نہ کپت اِیں، گُڑا اے نادْراھی مارا سرجم ءَ چو تند ءَ ماں پتا اِیت ءُ پہ مُدامی گار ءُ گُمسار کنت۔
بَہ کَول ء واجہ ڈاکٹر منّان جان کہ وھدے مئے تانسریں بلوچ راج ءَ پھم اِت کہ من گُلاماں ءُ من ءَ گُلامی ءِ ھِلاپ ءَ آجوئی ءِ جُھد کنگی اِنت، پہ ھر وڑیں کُربانی ءِ دَیَگ ءَ تیار بُوَگی اِنت، گُڑا اے زُوراکیں ریاست داں دیر ءَ مئے گُلزمین ءِ سر ءَ جل اِت نہ کنت کہ مارا پہ دائِمی گُلام بدار اِیت ءُ وت واجہ بِہ بیت، اگاں ما گُلامی ءِ نادْراھی کِمار نہ کُت گوں وتی چار روچیگیں زندمان ءَ دزگٹّ ءُ گُلائیش بوت اِیں، گُڑا گُلامی ءِ اے تھاری مارا دیم پہ رُوژنائی ءِ نیمگ ءَ سپر کنگ ءَ نیل اِیت، بلکیں بیگواہ کنت۔
پرے ھاتر ءَ من وتی گُلیں بلوچ راج ءَ اے ھبر ءَ گْوشگ لوٹ آں کہ ڈاکٹر منّان بلوچ ءَ ھوار کہ ھزاراں بلوچ پُسّگ اے جُھد ء آجوئی ءِ راہ ءَ ندْر بوتگ، پہ مئے شُمئے وشیں باندات ءَ، اگاں نا آیاں ھم چو مئے رنگ ءَ وتی زندگی گْوازینت کُتگ اَت۔ پمشکا مارا گوں راجی آجوئی ءِ جُھد ءَ ھوار وتی راجی جُھدکارانی پہ ھر وڑیں کُمک ءَ ساڑی بُوَگی اِنت۔ چے کہ مئے کد ءُ بالاد، چے کہ مئے بِستار ءُ گُنجائشت اِنت، مارا وتی راجی جنگول ءُ جُھدکارانی ھر داب ءَ کُمک کنگی اِنت، چی ءَ کہ آ پہ مئے وشیں باندات ءَ ندْر بُوَگ ءُ کُربانی دَیَگ ءَ اَنت، گُڑا اے مئے راجی زِمّہ واری بیت کہ ما آیانی مدّت ءُ کُمک ءَ ساڑی بِہ بَہ اِیں۔۔۔۔۔۔۔۔
ھمے رنگ ءَ اے ھبر ءَ مرچی بلوچ راج ءِ ھر زھگ پہ منّگ ءَ ساڑی اِنت کہ ڈاکٹر منّان بلوچ راج ءِ ھما مزن نامیں رھشُون ءُ بامرد اِنت کہ سداں سال پِر بِہ گْوز اِیت آئی ءِ مٹّ ءُ دروَر ودی نہ بیت، ءُ دومی ما اے ھبر ءَ ھم بِہ زان اِیں کہ شھید کدی نہ مِر اَنت، بلکیں پہ دائِمی زندگ ءُ نمیران بَہ اَنت۔ آیانی رِتکگیں ھونانی وشبو ھرگور ءَ شِنگ ءُ تالان بَہ اَنت، آیانی پِکر ءُ لیکہ دائم مئے رھشُونی ءَ کنت ءُ تچکیں دگ ءِ شُون ءَ دنت۔ پمشکا آ ھِچ رنگ ءَ شموشگ ءُ بیھال کنگ نہ بَہ اَنت۔
وھدے 31 جنوری 2016 ءَ واجہ منّان جان گوں وتی چار بھادِریں سنگت ءِ ھمراھی ءَ شھید کنگ بیت، ما سک دِلپدرد بَہ اِیں، تاں روچ ء مرچی آئی ءِ ٹپّ تاجگ اَنت۔ اگاں کُجام ساھت ءَ واجہ منّان ءِ ھیالاں کپاں، چہ دل ءِ بنداں آھے چِست بیت ءُ تیوگیں بالاد ءَ ژامبلینیت۔ انچو گُمان بیت کہ واجہ منّان جان ءِ شھیدی ءِ ھال ساھتے بیت کہ مارا رستگ ءُ ار بوتگ۔
پمشکا اے گپّ سددرسد راست اِنت کہ ما واجہ منّان جان ءِ کمی ءَ مُدام مار اِیں، ءُ گوں ما واجہ منّان جان ءِ کمی کدی سرجم ءُ پُورا کنگ نہ بیت۔ اگاں ما سد مردم یکجاہ بِہ بَہ اِیں، پد ءَ ھم واجہ ڈاکٹر منّان جان ءِ کمی پشت کپ اِیت ءُ سرجم نہ بیت، چی ءَ کہ آئی ءَ را وتی زِندمان ءِ چاریں روچاں ابید راجی آجوئی ءِ کاراں دِگہ ھِچّ کار نیست اَت۔
پمشکا من گْوش آں کہ واجہ منّان جان وتی بالاد ءُ اندر ءَ یک اِدارھے اَت۔ پہ وانگ ءُ زانگ ءَ یک درسگاھے اَت، یک پچیں کِتابے اَت۔ اگاں یک ساھتے ھال ءُ اھوال، گپّ ءُ تران ءَ بِہ بوتیں، گُڑا انچو سما بوت کہ واجہ ڈاکٹر منّان گوں اے پٹکیں بالاد ءَ راجدپترے ءُ وت ءَ درشان کنگ ءَ اِنت۔۔۔۔۔۔۔۔۔۔
پمشکا من گُڈّی ءَ یکرندے پد ءَ اے گپّ ءَ گْوش آں کہ منی اے چاریں لبز واجہ ءِ کد ءُ بالاد، مزن نامیں بِستار ءَ ھِچّ رنگ ءَ بیان کُت نہ کن اَنت، بلے منی دِل ءِ لھڑیں پاھار اِت اَنت کہ من یک نودربرے ءِ بسات ءَ درشان کُت اَنت۔ آجوئی زِندگ بات۔۔۔۔۔۔۔۔۔