رھن اَنت تئی پِگرانی ارواہ مرچاں تماہ ءِ گواچِن ءَ
سِچکانیں تئی گرنچانی موسم اھوالاں گوں
پیلوشتگیں سوداگرے مرچاں تئی وھمانی دل
ھالیگ تئی مھرانی کاسگ پہ مُرتگیں آدم دلاں
پشت کپتگیں اُوگارتگاں پہ جنگلاں
تو رپتگ ءِ دیر اِنت چِداں گوں موسماں
اھوال ءُ تئی نیکّیں سَمر
تئی گوشتگیں گُپتار ءُ گال
وھم ءُ ھیال مٹ بُوتگاں پہ روگِنیں نیمونیاں
راستاں پلار مرچاں تئی
گُژناں پکیری ساھگے مانپوشتگ چہ گِلّھاں
کبراں کلمپوگ مان کُتگ تو ارزُنیں پہ دانکے ءَ
مرچاں تئی وھمانی پند گاریِں گِلگ
دمکاں چِراگاں بیدھاں
رنگاں شُناس اِنت گوں گِلّھیں
راستاں پلار مرچاں تئی ۔۔۔ منیر معراج
