گُڈی بھر
آیاں راج یک انچیں بدیں سسّایے ءِ تہ ءَ بندیگ کُتگ ات انت کہ ٹَک ءِ لس مھلوک ھمے گْوشگ ءَ اَت سرکار گوں مئے نواب ءَ جنگ ءَ وَ نہ اِنت گُڑا ما پرچی ءَ ھمے جنگ ءَ بھر بزور ایں! داں وھدیکہ مئے میر تُپنگ نہ زِیر ایت ما گوں ھمے جنگ ءِ ھوار نہ بہ ایں! بزاں کوڑائیں میر ءُ نواباں راج مُدام رَد داتگ، راج ءِ تہ ءَ اِے وڑیں نادْراھی داں بُنگیج ھست اَت ءُ انگت ءَ ھم ھمے نادْراھی بازیں دمگاں ھست اَنت کہ ھمے لھتیں دمگاں آشوبے ودی کنگ لوٹ ایت، اود ءَ راج سرپدی دیگ لوٹ ایت کہ تو گلامیں راجے ئے۔
چوناھیگا اِے دُراہ کوڑائیں میر ءُ نواب دژمن ءِ لاھو کُتگیں کُچک اَنت کہ بلوچ راجی آجوئی جُنز ءِ ھلاپ کار کن اَنت، راج ءِ زیردست ءُ رَد دیگ ءَ دژمن ایشاں بے کس زَر، زِند ءِ ھمُک آسراتی، لب ءُ لالچ دنت، اِے سرکاری ھیراتاں وت سِلکاری(کرپشن) کن اَنت، راج ءَ راجی زُبانی وانگ ءَ نئیل اَنت بلکیں راج ءَ زورگیر ءِ زبان ءِ وانگ ءَ بے وس کن اَنت، ایشانی جِند ءِ زھگ انگریزی وانگجاھاں وان اَنت پمیشکا ایشاں راج ونڈ ءُ چُنڈ داشتگ کہ راج مُدام وتی گلامی ءَ ناسرپد بہ بیت، ایشاں راج ءِ بزگیں لس مھلوک وتی زاتی گلام ءِ داب ءَ داشتگ اَت ایشی ءِ مستریں نشانی مرچاں ماں رسانکدر ءَ راج ءِ دیم ءَ انت کہ بانُک ھیراُلنسا مگسی گْوش ایت کہ وتگڑیں نواب ھالد مگسی ءُ نواب نادر مگسی ءَ پہ منی کِشت ءُ کِشار ءِ ڈگارانی زورگیرگ ءَ من ءَ ھپت سال ءَ ماں وتی زاتی زِندان ءَ بندیگ کُتگ ءُ منی اِزت اش لگتمال کُت۔ ھمے رنگ ءَ بلوچ راج ءِ اولی پْراھگی واجہ یار جان بلوچ ءَ ماں یک وتی بیانے ءَ درشان کُتگ کہ دمگی کوڑائیں میر اسمائیل بُلیدی آیانی کھول ءَ بیھار دیگ ءَ انت ءُ آیانی ڈگاراں زور چہ آیاں پولگ اِنت، بزاں اِے ڈولیں ھزاریں درور ھست انت کہ راجدْروھیں میر ءُ نواباں راج ءِ سر ءَ وڑ وڑیں زوراکی کُتگ انت۔
راستی وَ ایش انت کہ دژمن ھم جْوان سرپد اِنت کہ اگاں ما بلوچستان ءِ یک میر ءُ نوابے بھا زُور ایں ءُ وتی کُچک ءِ داب ءَ گلام کن ایں گُڑا ھما ٹک ءِ سرجمیں تبک زیردست بیت ءُ ھما دمگی بلوچ ءِ تہ ءَ گلامی ءِ مارشت ودی نہ بنت۔ اگاں نواب مئے لب ءُ لالچ ءَ نیاتک گُڑا ھما دمگی بلوچ آشوبی بنت ءُ وتی راجی سِلاھبندیں جُھد ءِ باسک بنت پمیشکا زورگیر چہ دُرستاں پیش ٹکری میر ءُ نواباں بھا زُور ایت ءُ راجی جُنز ءِ ھلاپ ءَ سِلاھبند اش کنت۔ چی ءَ کہ اے گُجرانوالا، سیالکوٹ، چکوال، ساھیوال ءُ پیسل آباد ءِ تینو مینو چوں بلوچ راج ءِ کوہ ءُ دمگاں سوھو بنت۔ اے ناشناسیں زورگیر ءِ سوھو کنوک ما وت ایں، مئے راجدْروھیں میر ءُ نواب اَنت کہ ایشانی برکت ءَ ما مرچاں یک تررڈ کلاس پنجابی ءُ گُجر ءِ گلام ایں۔
بہ گِند ئے بلوچ نودربری گل(بی ایس او) ءَ مُدام راج ءَ سرپدی دات کہ بلوچ راج ءِ مستریں دژمن بلوچ راج ءِ دمگی میر ءُ نواب اَنت پمیشکا دمگی کوڑائیں میر ءُ نواباں بی ایس او ءِ جُھدکار وتی دمگاں پہ راج ءِ آگاھی ءَ نہ اِشکتگ انت۔
اگاں ما بلوچ راج ءِ مرچیگیں راجی سِلاھبندیں چیر جنگ ءَ چمشانکے دے ایں گُڑا ما زان ایں کہ ھستیں وھد ءِ راجی جُھدکار دُراہ بلوچ راج ءِ نیامگی تبکیں( مِڈل کلاس) وانِندگ اَنت ءُ بازیں نیام تبکی بلوچ راجی سِلاھبندیں جُھدکار ءُراجی رھشُوناں ھیسی ئیں سر پہ راج ءِ روژنائیں باندات ءَ کُربان کُتگ انت انچوشکہ شیھد شھداد بلوچ، اھسان بلوچ، میجر نورا بلوچ، جنرل اسلم، شھید بالاچ مری، شیھد ھالد بلوچ، نواب اکبر ھان بُگٹی۔۔۔۔ بانُک لُمہ کریمہ بلوچ ءُ دگہ ھزاریں راجی شھید کہ اے دُراہ مُدام گوں بی ایس او ءَ ھمگرنچ اِت اَنت ناں کہ ماں میر ءُ نوابانی زھگ ءُ چُکے ماں راجی جُھد ءَ گِند ایں بلکیں میر ءُ نوابانی زھگ سرکار ءِ دپچٹ ءُ کاسگ چٹّ اَنت۔
مئے نز ءَ بلوچ راج ءِ مستریں دژمن ءُ راجدْروہ وتگڑیں میر ءُ نواب اَنت کہ راجی آجوئی ءِ ھلاپ ءَ کار ءَ اِنت باید اِنت اِے دمگی میر ءُ نواب وتی راجی دژمنی ءَ یلہ بہ دے اَنت ءُ نواب ھیربکش مری ءُ نواب اکبر ھان بُگٹی ءِ دْروشم ءَ پہ راجی آجوئی ءَ پاد بیا اَنت، وتی راج ءِ تہ ءَ بلوچ راجی جُنز ءُ راجی آجوئی ءِ بارہ ءَ آگاھی بیار اَنت کہ مرچاں گجر ءُ پنجابی بلوچ راج ءِ چُکچینی کنگ ءَ انت ءُ ما وتی راجی جُھدکاریں بلوچ بْرات ءُ گْوھارانی ھمکوپگ بہ بہ ایں۔ ما بلوچ وت یک جُتائیں راج ءُ یک جُتائیں پجّارے واھُند ءَ ایں پمیشکا مارا گوں اے گُجر، پنجابی ءُ سندھی ءَ ھچ سْیادی نیست بلکیں مئے بلوچستان مُدام یک آزات ءُ وتواجھیں ڈیھے بیتگ ءُ نی باید انت ما پہ وتی ڈیھ ءِ آجوئی ءَ یکمُشت بہ بَہ ایں۔
البت اِے گپ ءَ ھم راجدْروہ تچک بہ بنت وھدیکہ بے کساس کربانی ءِ آسر ءَ گلامیں راج آجو بنت گُڑا چہ دُرستاں پیش زِندگیں راج وتی ماتیں وتن ءِ راجدْروہ ءُ کاسگ چٹّاں کُشت کہ چریشی ءَ نوک آجوئیں راج گیشتر مھکم بیت چی ءَ کہ اگاں راج ءِ چاگِرد ءَ کاسگ چٹّ ءُ راجدْروہ بنت ھما راج ءِ باندات تھاروکی ءِ آماچ بیت۔ راج ءِ تہ ءَ راجدوستی ھم ھچبر ودی نہ بیت بلکیں نوک آجوئیں مُلک بے رھبندی ءُ سِلکاری ءِ آماچ بیت چریشی ءَ مُلک دیمروی وَ نہ کنت بلکیں بینکرپٹ بیت پمیشکا پہ راجی تپاکی ءُ یکمُشتی ءَ راجدْروہ وَ ھر پیم ءَ کُشگ بہ بنت کہ مُزّ ءُ آمید البار بہ بیت، ستر ھر وڑیں جاور بہ بنت۔
بلوچ راج ءِ ٹکی سروگان شالا ھوش ءَ سار کنان ءَ گلامی ءَ مار انت ءُ وتی راج ءَ پہ راجی آجوئی ءَ سکین بہ دے اَنت، راج شالا زیت یکمُشت ءُ تپاک بہ بات۔ گلامی ءَ پِٹ بات ءُ بلوچ راج وتی راجمستری (ریپبلک) آجوئیں ڈیھ بلوچستان ءِ وتواجہ بہ بات۔ شالا انچوش بات۔
ھلاس اِنت۔