شہدائے مستونگ(کلی دتو)نامءَ |میجرمجید

تو ابدمان ءُُ تو نمیران ئے
تو گلیں راجءِ عزت ءُُ شان ئے
خالدءُُ دلجانءُُ توئے اکبر
آجوئی جنزءِ مُہریں ایمان ئے
شہیدڈاکٹرمنان بلوچ
شہید ساجد بلوچ
شہیداشرف بلوچ
شہید حنیف بلوچ
شہیدبابو نوروزبلوچ
سلام گشاں شہدائے مستونگ (کلی دتو)ءِ بامرداں کہ وتی جان اِش پہ وتی گُلزمینءَ ندرکت ءُُ نمیران بیت انتءُُ وتی نام اِش ماں بلوچ راجدپترءَ نکش کت۔
شہدائے مُرگ آپ ءَ چہ پد بی این ایمءِ اے دومی مستریں کربانی اِنت۔ہنچوش کہ شما کل سرپد اِت کہ بلوچ شہیدانی لڑسکّ دراج اِنت۔
”شہدائے مستونگ“ءِ یاتءُُ ترانگ تاں سکّ دیرءَ مان اَنت۔ءُُ جنزء آجوئی ءِ اے شپ چراگ بلوچ کاروانءِ منزلءَ راہ شون ءَ اَنت۔ شہدائے مستونگ کلی دتوءِ شہیدانی حون جنزء آجوئیءِ مانزمان اَنت۔ شہیدءِ ھونءِ ہر ترمپے پہ دژمنءَ دریاءِ نیل جوڑبیتءُُ دژمنءُُ زورگیرءِ زلمءِ بادگیرءَ لپاشیتءُُ گارءُُ بیگواہ کنت۔ انسانیتءُُ ھکّءُُ انساپءِ نوکیں زندے پیشداریت۔
ڈاکٹرمنان بلوچ شہیدفدااحمدءِ نزیکیں سنگتانی درچءَ زانگ بیت۔ڈاکٹرمنان بلوچ، بلوچ نیشنل موومنٹءِ بن ہشت ایرکنوکاں چہ یکّے۔ ڈاکٹرمنانءَ بلوچ راج چہ تہاریءَ درکتءُُ رُوژ نائی شون دات۔ بلوچ راجءَ را آجوئیءِ سکین دات۔ علمیءُُ سائنسی بنیادءَ بلوچءِ راجی جہد مہکم کت کہ تاں روچ ء مروچی جاریءُُ ساری اِنت۔ شہیدڈاکٹرمنانءِ بہادریءُُ جوانمری،ایماندار ی وتی مثال وت اَت۔ اے دابیں انسان وش بھتیں راجانی اندرءَ ودی بنت کہ آہانی سوچءُُ فکر،راجءِ رہشونیءَ کنت۔۔ڈاکٹرمنانءِ شہادت پہ بلوچ راجءُُ ایدگہ کلّیں غلامیں راجاں مولیں تاوانے، بلے آجوئیءِ ھاترا سرانی کربانی الّمی اِنت۔ آجوئی ہون لوٹیت۔ پہ لگوریءَ آجوئی نہ رسیت۔ ڈاکٹرمنانءِ سوچءُُ فکرزندگ مانیت۔اے دژمنءِ احمقی انت کہ فردانی شہادتءَ چہ جنز نزوربیت۔بلوچ جنزءَ ادارہ دیمءَ برانت۔دژمنءَ دگہ بازیں ڈاکٹرمنانءِ گونگیں بامرد شہید کتگ،بلے جنزءَ ردوم زرتگ،مہکمیں ادارہ آجوئیءِ جنزانی سورت چہ ما جتا انت بلے پگری حوالہءَ ڈاکٹرمدام گوں جہدءَ ہمراہ اِنتءُُ ہمکوپگ انت۔
انچوکہ ملا قاسم گوشیت:
دنیا استینء برسرء مردانی شزایت
ساہتے گونڈیں یک رگام جنتءُُ گوزایت
بے دلیں مردانءَ نشان انت نامءُُ دپی
کوڑواں لیگارنہ بنت پہکیں اشرفی
ہمے وڑا شہدائے مستونگءِ براہمدگاں بلوچ راجی جہدءَ را پہ مرادانی منزلءِ نیمگا گوں تیز تریں گاماں رہادگ کت۔ ڈاکٹرمنانءَ وتی سرجمیں زند پہ بلوچ راجءِ عزت، ننگءُُ ناموسءُُ پجّارءِ سربلندیءِ ھاترا ندرکت۔ڈاکٹرمنانءُُ اے سنگتاں مرگ چمّء وت دیستءُُ وش اھت کت۔دژمنءِ یزیدی لشکرءِ دیمءَ لگورنہ بیت انت۔ وتی سلاہ اش ایرنہ کت۔دژمنءَ پیش سلام نہ بیت اَنت۔ بلوچءِ کدیمی دودے زند گ کت کہ بلوچ مرتگ بلے سرءُُ سِلاہ یے نہ سستگ۔
ہنچو کہ میرحمل کلمتی گوشیت:
زندءَ سنجانی برگ سکّ انت
من مراں سنجانی برگ ھکّ انت
میرحمّلءِ اے درّیں دانک 750سالءَ پد چہ ڈاکٹرمنان گوں وتی سنگتاں مروچی پدا نوک کتءُُ وتی بلوچی کولءِ ثبوت دات۔
من گوں کلیں بلوچ آجوئی جنزءِ سرخیلاں دزبندی کناں کہ ڈاکٹرمنانءُُ اندگہ شہیدانی مشنءَ گوں تپاکیءَ دیمءَ بہ برانت کہ اے مشن کلیں بلوچءِ مشن انت۔ ڈاکٹرمنانءِ ادارہءَ مُہرءُُ مہکم بہ کن اتءُُ ڈاکٹرمنانءِ سوچءُُ پگرءَ بلوچءِ گس گسءَ سربکن ات۔
اب تہارے حوالے وطن ساتھیو
ڈاکٹرءَ وتی وھد، وتی زندگی، وتی آرامءُُ آسائش، وتی زہگءُُ کہول پہ بلوچءِ وشیں زندءُُ پجّارءِ ھاترا ندرکت انت۔پہ ہمے امیتءَ کہ منی سنگت راجءِ پُسّگ منی کاروانءِ ہمبل منی بلوچ،راج اے مشنءَ سرجم کنت۔
اے بلوچ راجءِ راجی فرض انت کہ شہید ڈاکٹرءُُ آئیءِ سنگتانی اے پروگرامءَ دیمءَ بہ برانت۔
انچو کہ من پیشءَ گشت ڈاکٹرشہید یک فردے نہ بیتگ یک ادارہ یے بیتگ ادارہ تاں ابدمان انت۔ علمءُُ زانتءُُ پگرکسّی مھتاج نہ انت۔
انچوکہ بلوچی بتلے: دانشءِ واجہ مانشءِ منجارنہ بیت۔
ڈاکٹرشہیدءِ علمءُُ زانتءَ ماں بلوچستانءَ یک جنزءُُ یک آشوبے آورتگءُُ مروچی بلوچ راج چہ ڈاکٹرشہیدءِ آشوبی علمءُُ زانتءَ سرریچ انت۔
گلیں ہمبلاں: گوں شما دزبندی کناں کہ وت جنگی حکمت عملیءِ بابتءَ چمّ شانکے بدیت۔ وتی جان سلامتیءِ بابتءَ چارءُُ بچاربکن ات کہ دژمن سکّ بازچالاک انت۔ وتی ترّءُُ گردءُُ دورہ آنی درگتءَ سکّ بازشیواربہ بت۔ ادا منی متلب لگوری نہ انت بلے بلوچ گو ش ایت:
دژمن اگاں مورے تو آئیءَ مزارے سرپد بہ بی۔
گڑا ڈاکٹروڑیں سنگت اے وپتگیں وابءَ بیران نہ بیت۔ڈاکٹر شہید دابیں سرمچارانی جاگہہ تاں دیران ھالیگ بیت۔ انچو کہ من گوشت۔ جہدفردانی محتاج نہ انت۔ بلے راجی جنزانی اندرءَ بامردانی ہم بلاہیں بستارے۔ جنزاں جوانیں سروک دیمءَ برانت۔جوانیں ادارہ ہم جوانیں رہشون جوڑکنت۔ انچوکہ بی این ایم شہید غلام محمدءُُ سنگتاں جوڑکت کہ مروچی بلوچ راجی آجوئیءِ مزنیں ادارہ یے کہ عام مہلوک آئیءِ سرءَ بیسہ کت کنت کہ یاکہ اندگہ انقلابی ادارہ کہ مروچی است انت۔
گلیں سنگتاں!! دژمنءَ مئے سرپانی اندرءَ بازیں میرصادقءُُ میرجعفر جوڑکتگ انت۔مئے دریءُُ اندری دژمن بازانت۔اے درگتءَ یک نوکیں حکمت عملی یے جوڑکنگ بہ بیت۔کہ آستینکءِ ماراں بہ ماراتءُُ بہ زان ات۔پرچاکہ آستینکءِ مارگندگ نہ بیت۔سکّ ڈنگ جنت سکّ بازھیرت ھیرتءُُ چارگءُُ ٹپاسگے لوٹ ایت۔گُڈسرءَ من دزبندی کناں گوں وتی راجی جنزءَ سرھیلاں کہ تپاک بہ بنت۔دژمن مئے خلافءَ تپاک انت۔
مارا ہم تپاکی لوٹ ایت۔ شہیدڈاکٹرمنانءِ گوں سنگتانی شہیدءِ بیگءِ ثواب پہ تپاکیءِ شوہازءَ گوں سنگتانی گندءُُ نندءِ ھاترا ببیت۔شہیدءِ ھونانی احترامءَ آجوئیءِ جنزءِ سرخیل تپاک بہ بنت۔
تپاکی آجوئی جنزءِ مانزمان انت
بلوچستان آجوبات
٭٭٭