جلوھے لوٹ ئے گُڑا سمبھین کردار ءَ وتی
ھُشکیں بالاد ءَ مہ سینگار من ءَ کندگ کَیت
” زبیر مکتار “
کردار مردُم ءِ پجّار اِنت ، ھر مردمے بہ بیت آ چہ وتی کردار ءَ زانگ بیت ۔ اے درگت ءَ ھما وھد ءَ مردم وتی کردار ءَ سمبھینت کنت ، چہ وتی زات ءِ واھشتاں در بئیت ءُ وت ءَ راجی دیمروئی ءِ ھاتر ءَ ساجو بِہ کنت ۔ ھر مردمے بہ بیت آ پہ وتی کردار ءِ سمبھینگ ءَ وتی دل ءَ یک واھگ ءُ ھیالے دار اِیت ، بلے ھما مردم سوبین بیت وتی تہ ءَ ھِمّت ، توکل ءُ ھاٹیگے ودی بہ کنت ءُ گوں وتی لیکہ ءَ اِیماندار بہ بیت ۔
اے یک راستی یے کہ اے جھان ءِ تہ ءَ لھتیں مردم نہ مِر اِیت ، بلکیں پہ مُدامی اَبدمان ءُ نمیران بیت ۔ گڑا چہ بازیں جیڑگ ءَ پد اے ھبر پدر بیت کہ نمیرانی ءِ پُشدر کردار اِنت ۔ شرّیں کردانی واھُند کرنانی کرن مان اَنت ، آھاں ھرکس زانت ۔ اے جھان ءِ تہ ءَ بنی آدم ءِ لڑ سک مزن اِنت ءُ دائم مردم ودی بُوَگ ءُ مِرگ ءَ اَنت ، بلے مُرتگیں مردُمانی تہ ءَ لھتیں کردار انگت زندگ اَنت ۔ پہ درور ڈاکٹر چے گویرا ، مارکس لینن ، چیئرمین ماؤ ، کمال اتاترک ، نیلسن منڈیلا ، ھوچی منہ ، بگت سنگھ ، لیلا خالد ءِ رنگ ءَ زانگ بَہ اَنت ۔ ھمے ھاتر ءَ کہ آھاں پہ وتی راجی آجوئی ءَ جُھد کرتگ ءُ سوبین بوتگ اَنت ۔ ھر مردمے کہ پہ وتی راج ءَ جُھد کنگ لوٹ اِیت ، گڑا الّم ءَ آھاں وان اِیت ۔
وھدے بلوچ ءِ اے گُڈّی جنگ چہ دوھزار ءَ بندات کنگ بیت اے بیست ءُ یکمی سال ءَ یک مھکمیں رنگے ءَ جُنزاں اِنت ۔ ما سدکاں بلوچستان ءِ آجوئی مئے ایمان اِنت مئے جُھد پہ آ دگہ ایردستیں راجاں یک سکین ءُ رھشُونی یے بیت ۔ ما وھدے وتی گل ءِ دیوانانی تہ ءَ نشتگ اِیں، ھمے گپ دائم اِش کتگ کہ آشوب وتی زھگ ءَ وت وارت ، بلوچ ءِ اے جنگ ءَ بلوچ راجی بھادُریں بچّانی شھیدی ءَ ھوار مئے لھتیں رھشُون شھید کنگ بیتگ ءُ لھتیں زندانی اِنت ۔ مئے شھید بیتگیں رھشوناں شھید نواب اکبر بگٹی ، شھید بالاچ خان مری ، شھید گلام مھمد بلوچ ، شھید لالا منیر بلوچ ، شھید شیرمھمد بلوچ ، شھید ڈاکٹر منان بلوچ ، شھید استاد اسلم بلوچ ، شھید رزا جھانگیر ، شھید استاد سباء دشتیاری ، شھید ھاجی رزاک بلوچ ءُ دِگہ بازیں رھشون شھید کنگ بوتگ اَنت ۔ بازیں مئے رھشون دُژمن ءِ زنداناں بندیگ اَنت ڈاکٹر دین مھمد بلوچ ، چیئرمین زاھد بلوچ ، زاکر مجید ، شبیر بلوچ ءِ رنگ ءَ انگت آھانی پگر مئے رھشونی ءَ کناں اِنت ۔
چہ ھمے بلوچ راجی رھشونیں شھیداں یکے مئے شیرزالیں گوھار لُمّہ کریمہ بلوچ اِنت 21 ( دسمبر ) تاکشان 2020 ءَ ماں کینڈہ ءَ شھید کنگ بوت ۔ لمّہ ءِ بزانت ماس اِنت ، اے لبز ھمک اِش کنوک ءِ زھن ءِ تہ ءَ یک جُستے ودی کنت کہ اے کسانسالیں گوھار چون یک راجی ماسے بوت کنت ۔ ءُ من ھمے گپ ءَ گْوش آں اے گوھار ءَ وتی کردار انچو رُودینتگ ءُ مزن کُرتگ ھر بلوچ ءِ دل گْوش اِیت من آئی ءِ نام ءَ چیزّے بِہ گوش آں ، ھر نبشتہ کار گْوش اِیت من چیزّے نبشتہ بکن آں۔ وھدے آئی ءِ کْوھین کرد مردم ءِ دیم ءَ اُوشت اِیت، گڑا نبشتہ کار ءِ زھن کار ءَ یلہ دنت ءُ دست ءِ ند لرزگ ءَ بنا کنت ، ھمک لبز ھمے گوش اِیت کہ من اے کوھین کردار ءِ دیم ءَ انساپ کرت نہ کن اَں ۔
بلوچ راج ءِ اے دْراج کشّیں گُلامی ءَ بلوچ ءِ دود ءُ ربیدگاں بلوچ ءِ زالبول تھنا لوگ ءِ باھوٹ کرتگ اَنت ،پہ زالبول ءَ راجکاری دُوریں گپّے بوتگ ۔ پہ وانگجاہ ءِ روگ ءَ موکل نہ بوتگ ۔ بانُک کریمہ بلوچ ھمے چاگرد ءِ تہ ءَ ودی بیت ، وان اِیت ءُ راجکاری بنا کنت ۔ بلوچستان ءِ آجوئی ءِ گپ ءَ کنت ۔ بلوچستان ءِ شھر ءُ بازاراں اَبید بلوچستان ءِ کوہ ءُ دمگاں بلوچ راجی آجوئی ءِ کلوہ ءَ بارت ءُ سرکنت ۔ بلوچ ءِ ھمک پرزند ءِ تہ ءَ گُلامی ءِ مارشت ءَ گیج اِیت ءُ ھمے گْوش اِیت چہ واب ءَ بُست کن اِت وتی وتن ءَ چہ زوراک ءَ بہ رکین اِت ۔ بلوچستان ءِ ھمک پرزند پہ وتی وتن ءِ موکگ ءَ جُھد کنت ۔
مرچی بلوچستان ءِ تہ ءَ یا چہ بلوچستان ءَ ڈنّ بلوچ راجی آشوب یک جوانیں رنگے ءَ گندگ بُوَگ ءَ اِنت ، گُڑا اے آشوب ءِ تہ ءَ شھید بانُک ءِ یک بلائیں کردارے ھست۔ اے جُھد ءِ تہ ءَ مزنیں بھرے ھمائی ءِ جوڑ کرتگین اِنت کہ آ یک راجی رھشونے اَت پمیشکا آئی ءِ پگری ھمراھاں آئی ءِ نام لُمّہ کرتگ اَت ۔ آ بلوچ ءِ جُھد ءِ پِڑ ءَ پہ ھمک جُھدکار ءَ ماسے ءِ ھساب ءَ بوتگ ۔ آئی ءَ وتی ماس بُوَگ ءِ ھکّ ادا کرتگ ۔ آئی ءِ شھیدی وت اے گپ ءَ پدر کنت بانُک کریمہ کے بوتگ ، آئی ءِ شھیدی بلوچ ءِ ہر گِس ءَ پُرسیگ کنت ، چی ءَ کہ آ راجی سروکے بوتگ۔ آئی ءِ شھیدی راجی تاوانے ، بانُک کریمہ بلوچ ءِ شھیدی گوں بلوچ راج ءَ ھوار پہ دری راجاں یک تورناکیں ویلے بوتگ ۔
چہ بلوچ راج ءَ اَبید دری راج پہ بانُک ءِ ناھکیں کوش ءَ توار چِست کنگ ءَ اَنت ۔ اے یک راستی یے کہ یک مردمے چہ وتی جند ءِ واھشتاں در بئیت پہ وتی راج ءِ ھاتر ءَ جُھد بِہ کنت، گڑا آئی جھُد پہ سرجمیں انسانیت ءَ جُھد زانگ بیت ۔ باُنُک کریمہ بلوچ ءَ بلوچ راج ءِ سرا بووکیں زوراکیاں ھوار دگنیا ءَ را ھمے گْوشتگ ءُ پیشداشتگ پاکستان تھنا بلوچ راج ءَ گوں نہ سندھی ، پشتون ، ھزارہ ، مھاجر ، چہ پاکستان ءِ تہ ءَ اَبید دری ملکانی تہ ءَ دھشتگردی کنگ ءَ اِنت ۔ گُڑا اے وڑیں انسان دوستیں رھشونے ءِ روگ پہ سرجمین دگنیا ءَ دردناک بیت ۔
چہ بانُک کریمہ بلوچ ءَ پد بلوچستان ءِ تہ ءَ شیرزالانی یک مزنیں کساسے گندگ بُوَگ ءَ اِنت ۔ بلوچ ءِ آجوئی ءِ جُھد ءَ اَبید بلوچ ءِ چاگردی ھمک جیڑہ ءِ سر ءَ توار چست کنگ بُوَگ ءَ اِنت اے کل شھید بانُک ءِ جُھد ءِ برورد اِنت دُژمن ءَ آئی ءِ جند چہ بلوچ راج ءَ جُدا کرت، بلے آئی ءِ پگر ھر بلوچ ءِ گِس ءِ تہ ءَ ساڑی اِنت۔