نستگ ند ءِ ھِیسکار ءُ آہ
تاک تاکیں زِرد ءِ دپتر ءَ
بُنگیج بیت آسر نہ بیت ،
انچیں تئی یات ءِ کِسّھے!
وانڈہ سرونّ ءَ ترانگے
گیچیت مھر ءِ مِھلباں
مینّیت گوں زپتیں واھگاں،
تھتال کہ ارساں کیل کنت
جُھدانی جُمب اِیت توکلے ،
سْیاھیں شپ ءِ بالاد زر اِیت
پہ بام ءِ برپیں لئیکو ءُ
پُلیں سمین ءِ کندگاں ،
تو پہ مُدیمی زِندگ ءُ
گْوست ءَ گوں پیوند دپترے
ھونانی بشّی ملپداں
میلانک بیت اِیں نوبتے
کار اِیت تئی اَھد ءِ کِسّھاں
شیرزالیں ڈیھ ءِ بانڑی
اُوستانی بالینت ڈیوی
دُژمِن لگوریں سوب نہ دات
رپت ئے گوں گنجیں واھگاں
مانداشت گیڑیں مکران
پُلیں بلوچستان ءِ بدن
تُمپ ءِ چراگیں مچکدگ
گوں بُلبُلی شیزارگاں
ھامین ءَ شھمے روک کنت
گیراں تئی دوچیت مولمے
سایت گوں زھیراں موسمے
دشت ءِ گیابیں کوچگ ءَ
شانتل گوں زیمیں نالگاں
کُوکُو کپوتی آس شان
تامور رُژنیں ماھکان
سِستگ چہ آزمان ءِ لد ءَ
اِستال درپشیں گوھرے
براتانی کوھیں توکلے
گْوھارانی اُوست ءُ زرمبشے
دُودانی مُھریں سنگرے
چَولانی گْوانک ءُ زیمرے
راج ءِ کلاتیں رھبرے
سِستگ چہ آزمان ءِ لد ءَ
اِستال درپشیں گوھرے
راج ءِ کلاتیں رھبرے
راج ءِ کلاتیں رھبرے
شیرزالیں کریمہ بلوچ ءِ نام ءَ – زِرگْوات بلوچ
