شَپ جَتیں مُساپرے آں روچ ءِ رَندپَداں گاراں کس من ءَ نہ دنت ڈسّے
زندماں توام اِنت نوں، هو گْوش ئے اے امروز ءَ منزلے نہ راهے هست
چوں کناں بھشت ءَ من انگت ءَ گلامیں راج داں کہ کیت منی هوش ءَ
بزگیں نوں گزو ءِ چے مَیار بیتگ کہ چُک ئِے چہ شُد ءَ مُرت اَنت
پہ سر ءِ مئے گاری ءَ چونیں پَندلاں ساز اِیت سھی نہ اِنت بلے واجہ
چونیں دل سَپایاں کہ، کئی سر ءَ من اوست بَستگ هَلک ءِ کوریں رهشُوناں
راستے تو تمردئی ءِ کُشتن ءَ وتی برات ءِ مانشاں مہ کن پِولنگ
دپتراں برو شوهاز چے کُتگ پْرنگاں گوں همّلیں تئی جیئند ءَ کمکے مَیاری بو
تو وتی پہ باندات ءَ لَب ءُ لاچ ءِ دیناں دُتکانی سودا جَت
کیامت ءَ ترا گوں اِنت آه ءُ بد اے ماتانی سدّک ءَ ببو دلجم
کے بزانت بستار ءَ ارزش ءَ مئے براتانی هون اِنچو ارزان اِنت
گلزمیں بدّیں ڈُنگاں کربلا کُتگ مرچاں دُژمِن ءَ گلے رستگ
بزگیں مزار ءِ بچّ تو پہ زانت تاواں کُت مورے تئی نہ وارت گُوش ءَ
چُنت دگہ هیات باریں! جان شُود اِیت گون هوناں مات ءِ کُور کنت چَمّاں